श्रेष्ठ हत्या प्रकरण: बाबुलाई जन्मकैद, छोरीलाई १० वर्ष जेल

पुस २३,

ग्लोबल आवाज

दाङ्ग । तुलसीपुरका प्रतिष्ठित व्यापारी राजकुमार श्रेष्ठको अपहरणपछि हत्या भएको घटनाको अढाई वर्षपछि मुद्दा फैसला भएको छ । सल्यानमा घटना घटेकाले जिल्ला अदालत सल्यानबाट मुद्दा चलाइएको थियो । जिल्ला न्यायाधिस कुलप्रसाद पाण्डेको ईजलासले यहि पौष ४ गते दोषी उपर कसुर निर्धारण गदै पौष १५ गते मुद्दा फैसला सुनाउदै व्यापारी श्रेष्ठको अपहरण र हत्या आरोपमा पक्राउ परेका ८ जनालाई कारागार चलान गरेको हो ।

हत्या आरोपमा पक्राउ परेका ११ जना मध्ये अन्य तिन जनाले सफाई पाएका छन् । अदालतले घटनाका मुख्य योजनाकार भनिएका तुलसीपुर ८ का २८ वर्षिय भुपेन्द्र भण्डारी, तुलसीपुर ११ कटाहाका ३० वर्षिय खुम बहादुर केसी र जमा पुनलाई निर्दोष ठहर गर्दै सफाई दिएको हो । सोहि घटनामा संलग्न भएको आरोपमा पक्राउ परेका अन्य ८ जनालाई अदालतले कर्तव्य ज्यान मुद्दा र अपहरण सम्वन्धि मुद्दामा छुट्टाछुट्टै कैद सजाय तोकेको छ । जसमा दाङ शान्तीनगर गाउँपालिका घर भई हाल तुलसीपुर ६ निवासी ४० वर्षिय टिकाराम घर्तिलाई कर्तव्य ज्यान मुद्धामा जन्मकैद सजाय सुनाईएको छ । अदालतका श्रेस्तेदार दिपक पोख्रेलका अनुसार घर्ति विरुद्ध थप अपहरण मुद्दामा १२ वर्ष कैदको सजाय तोकिएकोे छ । यस्तै अबिरल महतरालाई कर्तव्य ज्यान मुद्धामा ५ बर्ष र अपहरण मुद्धामा ९ वर्ष कैद र थप दुई वर्ष कैद सजाय सहित ५० हजार रुपैँया जरिवानाको फैसला सुनाईएको छ ।

यस्तै सल्यान झिम्पे ४ का मान बहादुर भण्डारी, मन बहादुर पुन, नारायण वली र रुगद थापालाई कर्तव्य ज्यान मुद्धामा ५ बर्ष कैद र अपहरण मुद्धामा ८ बर्ष कैद र थप दुई वर्ष कैद सजाय सहित ५० हजार रुपैया जरिवानाको फैसला सुनाईएको छ । यस्तै पुजा घर्तीलाई ८ बर्ष थप दुई वर्ष कैद सहित ५० हजार जरिवाना तथा बिरे घर्तीलाई ७ बर्ष थप २ बर्ष कैद सहित ५० हजार जरिवानाको फैसला सुनाईएको छ । घटनामा १४ जना संलग्न भएको भनिएता पनि ११ जना अभियुक्तहरु मात्रै पक्राउ परेका थिए । अन्य तीन जना अझै फरार रहेको प्रहरीले जनाएको छ । फरार हुनेमा दैलेख जिल्लाका लोकेन्द्र शाही र अन्य दुई जना रहेको प्रहरीले बताएको छ । २०७४ साल जेठ २६ गते साँझ अपहरण गरी तिन दिन पछि सल्यानको छत्रेश्वरी गाउपालिका वडा नं. ४ झिम्पे भन्ज्याङ भन्ने स्थानमा श्रेष्ठको शव फेला परेको थियो । घटना पछि प्रहरीले विशेष अनुसन्धान गर्दैै जादा घटनामा संलग्न भएको आशंकामा दुई जना व्यक्तिलाई पक्राउ गरेपछि मात्र उनीहरुले दिएको सुचनाका आधारमा श्रेष्ठको हत्या भएको स्थान र शवको पहिचान भएको हो ।

त्यसपछि उनीहरुकै बयानको आधारमा पोखराबाट शंकास्पद पाँच जनालाई नियन्त्रणमा लिएर अनुसन्धान गर्दा तुलसीपुरका रुपक थापा मगर र अविरल महतरालाई दाङ ल्याए पछि मात्रै उनीहरु दुवै जना घटनामा संलग्न भएको प्रहरीले पुष्टि गरेको हो । उनीहरुले श्रेष्ठलाई अपहरण गरी उनको घरपरिवारसँग तिन करोड फिरौती रकम मागेका थिए । श्रेष्ठको शव ढुंगाको थुप्रोमा पुरिएको अवस्थामा भेटिएको थियो । यस्तै श्रेष्ठसँगै घोराहीका ठेकेदार रणबहादुर घर्तिको पनि अपहरणपछि हत्या भएको थियो ।

उचित न्याय पाएनौ: पिडित पक्ष

राजकुमार श्रेष्ठको हत्या प्रकरणमा जिल्ला अदालत सल्यानले गरेको फैसलाले आफुलाई उचित न्याय नदिएको पिडित पक्षको भनाई छ । घटनाको मुख्य योजनाकार भनिएका भुपेन्द्र भण्डारीलाई सफाई दिनुले न्यायालय प्रति शंका उब्जिएको स्वर्गिय श्रेष्ठकी धर्मपत्नी निर्मला श्रेष्ठले बताएका छिन् ।

आफनो श्रीमान् गुमाएको अढाई वर्ष पछि उचित न्याय पाउने आसामा पर्खेर बसेपनि अदालतले जसले घटना घटाएको हो उसैलाई सफाई दिनुले आफु झनै दुखी भएको उनले बताएकी छिन् । ‘न्यायालयले दोषीलाई कारबाही गर्नुको साटो निर्दोष कसरी सावित ग¥यो कानुन बुझ्न सकिएन’ उनले भनिन् । श्रीमान्को बास्तविक हत्यारा को हो ? आफुले मुद्धा फैसला होला र न्याय पाउला भनेर बसेपनि उचित न्याय पाउन नसकेको उनको भनाई छ ।