भूगोलविद् डा. हर्क गुरुङको शालिक निर्माण कार्य सुरू

लमजुङ । उत्तरी लमजुङको मर्स्याङ्दी गाउँपालिका ७ स्थित ताङलिचोकमा भूगोलविद् डा. हर्क गुरुङको शालिक निर्माण कार्य सुरु भएको छ । गाउँपालिकाले ०७९/८० को संघ सशर्त अनुदान, वातावरण विभाग कार्यक्रम तर्फको स्वीकृत बजेटबाट डा. गुरुङको शालिक निर्माण गर्न लागेको हो ।गत शुक्रबारदेखि शालिक निर्माणको कार्य सुरु भएको डा. हर्क गुरुङ प्रतिष्ठानका अध्यक्ष एवं मर्स्याङ्दी गाउँपालिका वडा नं. ७ का वडा अध्यक्ष तिल गुरुङले जानकारी दिए ।

गाउँपालिकाबाट १५ लाख रुपैयाँ र स्थानीयको दुई लाख ५९ हजार ४७ रुपैयाँ ९८ पैसा बराबरको श्रमदानमा शालिक पूर्ण रुपमा तयार गरिने गाउँपालिका अध्यक्ष अर्जुन गुरुङले बताए । २०८० जेठ मसान्तसम्म निर्माण सकिने गरी काम भईरहेको समितिले जनाएको छ । दुई रोपनी क्षेत्रफलमा निर्माण हुन लागेकोे डा. गुरुङको शालिक दुई फिटको हुनेछ ।शालिकको वरापर कम्पाउन्डीङ गर्ने, शैचालय निर्माण गर्ने, वृक्षारोपण गर्ने प्रतिष्ठानले जनाएको छ ।लमजुङको सविक बाहुनडाँडा गाविसको नाईचेमा जन्मिएर भुलभुले गाविसको ताङ्लिचोकमा हुर्किएका गुरुङ बेलायतस्थित नाचेर एडीनवरा विश्वविद्यालयबाट भूगोल विषयमा विद्यावारिधि गर्ने पहिलो नेपाली बनेका थिए  ।विश्व वन्यजन्तु कोष नेपालले आयोजना गरेको कन्चनजंघा संरक्षण क्षेत्र आयोजना स्थानीय समुदायलाई हस्तान्तरण कार्यक्रममा भाग लिएर फर्कने क्रममा हेलिकप्टर दुर्घटनामा परी २०६३ असोज ७ गते डा गुरुङको निधन भएको थियो ।

 ताप्लेजुङको घुन्सामा हेलिकप्टर दुर्घटना हुँदा भूगोलविद् डाक्टर हर्क गुरुङसहित २४ जना स्वदेशी एवं विदेशीले आफ्नो ज्यान गुमाएका थिए ।