तिलोत्तमा–१ मा किशोरीहरूलाई आत्मरक्षा तालिम

बुटवल । रूपन्देहीको तिलोत्तमा वाड नम्बर १ मा किशोरीहरूका लागि तीन दिने आत्मरक्षा तालिम सोमबार सम्पन्न भएको छ । तिलोत्तमा वाड नम्बर १ को वाड कार्यालयको आयोजना भएको सो तालिममा वाड नम्बर १ का करिब ५० जना किशोरीहरूको सहभागिता रहेको थियो । कार्यक्रममा नगर उपप्रमुख जागेश्वर देवी चौधरीले आत्मरक्षाको तालिम किशोरीका लागि महत्त्वपूर्ण रहेको बताइन् ।

Advertisement

आजका बालबालिकाहरू भोलिको नगरको पिल्लर रहेको बताउँदै नगरले बालबालिकाहरूका लागि लगानीको वातावरण सृजना गरिरहेको बताइन् । यश किसिमको तालिमले किशोरीहरूमा आत्मविश्वास जगाउने बताउँदै तालिमले महिला हिंसा केही हदसम्म रोकिन मद्दत मिल्ने बताइन् । प्रशिक्षक केबि रानाले जुनसुकै सिकाइको लागि व्यक्तिगत अनुशासन नभई केही गर्न नसकिने बताए । साथै समयको सहि सदुपयोग गर्न पनि यश किसिमको तालिम फलदायी हुनेमा उनले विश्वास व्यक्त गरे ।

वडास्तरीय बाल सञ्जालका अध्यक्ष अस्मिरा सुनारले यश किसिमको तालिमले किशोरीहरूलाई आत्मबल प्रदान गरेको बताइन् । उनले आफू सुरक्षित हुन सर्वप्रथम आँखामा आँखा जुधाएर प्रतिकार गर्नुपर्ने बताइन् । आत्मरक्षाको तालिम लिन पाएकोमा खुसी व्यक्त गर्दै यो नगरभरि नै सञ्चालन गर्न आग्रह गरिन् । कार्यक्रमको समापन गर्दै अध्यक्ष फर्सुराम गिरीले बालबालिकाको लागि अन्य वाडको तुलनामा यश वाडले बढी लगानी गरेको बताए । उनले पछिका दिनमा बालबालिकाको लागि अझ रचनात्मक कार्यक्रमहरू सञ्चालन गर्ने जनाए ।

कार्यक्रममा बालमैत्री सहजकर्ता रमा थापा र वाड सदस्यहरू गितादेवी न्यौपाने, हिरादेवी बिक, विष्णुप्रसाद पाण्डे, कार्यक्रम संयोजक वाड सदस्य मिलन रानाको उपस्थिति रहेको थियो । वाड नम्बर १मा रहेका करिब ५० जना किशोरीहरूलाई आत्मरक्षा तालिम प्रदान गरिएको हो ।