मोरङ ३ को चुनाव नसर्ने, उम्मेदवार निधन भएको ठाउँमा मनोनयन प्रक्रिया आजैबाट

काठमाडौं । मोरङ ३ अन्तर्गत प्रदेशसभा क्षेत्र नम्बर १ का नेपाली कांग्रेसका उम्मेदवार शेखरचन्द्र थापाको निधन भएपनि त्यहाँको निर्वाचन नसर्ने भएको छ ।

उम्मेदवारको निधनको औपचारिक जानकारी आएपछि आजबाटै निर्वाचन मनोनयन प्रक्रिया सुरू हुने प्रमुख निर्वाचन आयुक्त दिनेश थपलियाले नेपाल प्रेसलाई बताए । यहाँ कांग्रेसले अब अर्को व्यक्तिलाई मैदानमा सार्नुपर्नेछ ।उनले भने, ‘निर्वाचन हुने मितिको सात दिनअघि उम्मेदवारको निधन भएमा निर्वाचन रोकिँदैन । हामीलाई औपचारिक जानकारी आउनासाथ आजैबाट मनोनयन प्रक्रिया सुरू गर्छौँ ।’

प्रदेश १ का प्रदेश निर्वाचन अधिकारी लेवनकाश्यप अधिकारीले नेपाली कांग्रेसका लागि मात्रै मनोनयन दर्ता गर्न छोटो समय राखेर निर्वाचन कार्यतालिका सार्वजनिक गरिने बताए । निधन भएका थापा प्रदेश १ का वन वातावरण तथा भूसंरक्षणमन्त्री समेत हुन् । सो क्षेत्रमा एमालेका किशोर राई चुनावी मैदानमा छन् ।