ताजा अपडेट »

रुपन्देहीको भैरहवा बहुमुखी क्याम्पसमा शुल्क नबुझाएको भन्दै परीक्षाहलबाटै विद्यार्थी निकालिए

आइतबार, १९ भदौ २०७९, १७ : १७
14 Shares

बुटवल । रुपन्देहीको भैरहवा बहुमुखी क्याम्पसबाट शुल्क नबुझाएको भन्दै विद्यार्थीलाई परीक्षा दिनबाट बञ्चित गरिएको छ । विएस्सी सिएसआईटी तर्फको छैटौं सेमेस्टरका ३ विद्यार्थीलाई आइतबार भएको परीक्षाहलबाट निकालिएपछि विद्यार्थीहरुले बिरोध जनाएका छन् ।

यही भाद्र १६ गतेदेखि सुरु भएको परीक्षाको दोस्रो दिन परीक्षा दिन कक्षामा पुगेका ३ जना विद्यार्थीको हातबाट पेपर खोसेर निकाला गर्ने काम भएको पीडित विद्यार्थी आनन्द मिश्रले ग्लोबल आवाजसँग गुनासो गरे । उनीसँगै अमन सिं र सञ्जिव अधिकारीले परीक्षा दिन नपाई आइतबार घर फर्किनु परेको छ । ‘विएस्सी सिएसआइटी पोग्राम कोडिनेटर दिनेश मिश्रको निर्देशनमा हाम्रो हातबाट पेपर थुत्ने काम भयो ।’–पीडित विद्यार्थी आनन्द मिश्रले भने, ‘परीक्षा जस्तो संवेशनशिल विषयमा क्याम्पसले हाम्रो समस्या बुझिदिएन ।’ परीक्षार्थीहरुलाई बाहिर निकालेर समस्या समाधानका लागि क्याम्पस प्रमुख अनिल कुमार झासँग कुरा राख्न संयोजक मिश्रले निर्देशन गरेका थिए । यद्यपी उक्त सयम क्याम्पसप्रमुख त्यहाँ उपस्थित नभएका कारण विद्यार्थीहरुले आफ्नो समस्या राख्न नपाउनुका साथै परीक्षा दिनबाट बञ्चित भएका छन् ।

समयमा शुल्क नतिरेकै भरमा एक्कासी विद्यार्थीलाई परीक्षाहलबाट निकाल्ने काम अमानवीय र निन्दनीय कार्य भएको क्याम्पसको विद्यार्थी संगठन अनेरास्ववियु अध्यक्ष सागर न्यौपानेले बताए । विद्यर्थीहरुले शुल्क नबुझाएको विषयमा छलफल गरी समाधान गर्न सकिने अवस्थामा समेत क्याम्पस संयोजकले नियतबस विद्यार्थीलाई परीक्षाबाट पञ्चित गरेको उनको आरोप छ । ‘विद्यार्थीको भविष्यमाथि खेलवाड गरिएको छ । यदी विद्यार्थीले शुल्क बुझाएका छैनन् भने पनि पछि असुल उपर गर्नेगरी परीक्षा जस्तो संवेशनशिल कुरामा सहभागी गराउनु पर्ने हो ।’–न्यौपानेले भने, विद्यार्थीले परीक्षाबाट बन्चित भएपछि यसको जबाफदेही र जिम्मेवारी क्याम्पसले लिनुपर्छ, हामीलाई यसको जवाफ चाहिन्छ ।

घटनाको विषयमा क्याम्पस प्रमुख अनिल कुमार झाले पन्छिने प्रयास गरेका छन् । पीडित विद्यार्थीहरुलाई एडमिट कार्ड नलिएका कारण परीक्षाबाट बञ्चित गरिएको स्वीकार गर्दै उनले समस्या बारे विद्यार्थीले पहिले नै आफूलाई जानकारी गराउनु पर्ने प्रतिक्रिया दिए । १६ गतेदेखि सुरु भएको परीक्षामा शुल्क बुझाएर प्रवेश पत्र लिनुपर्ने भए पनि ती विद्यार्थीहरुले त्यसो नगरेको उनले बताए । यदी समस्या नै थियो भने आफू क्याम्पसमा नभए पनि फोन गरेर आफूलाई समस्या बताउनु पर्ने उनले बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।