मगर महिला संघ रुपन्देहीमा पुनः चन्दा थापा मगर

मंसिर १५,

Advertisement

ग्लोबल आवाज

बुटवल । नेपाल मगर महिला संघ जिल्ला समिति, रुपन्देहीको सातौं जिल्ला अधिवेशन १३ सदस्यीय नयाँ नेतृत्व चयन गर्दै सम्पन्न भएको छ । रुपन्देहीको सैनामैना स्थित थारु होमस्टेमा सम्पन्न अधिवशेनबाट अध्यक्षमा पुनः चन्दा थापामगर निर्वाचित गरेको छ । अध्यक्ष र कोषाध्यक्ष पदका लागि आकांक्षीहरु धेरै भएकाले सहमतीको प्रयास हुन नसकेपछि शनिबार राती ढिलोगरी सुरु भएको मतदान प्रक्रियाबाट नेतृत्व चयन गरिएको थियो ।

कुल खसेको २७ मतमध्ये नवनिर्वाचित अध्यक्ष थापाले २५ मत प्राप्त गर्दा अध्यक्ष पदकाा अर्का उम्मेद्वार कुमारी पुनले एक मत प्राप्त गरेकी थिइन् भने एक मत बदर भएको निर्वाचन समितिका अध्यक्ष गीता सारुले जानकारी बताइन् । अधिवेशनबाट उपाध्यक्षमा निर्मला थापामगर, सचिवमा सरिता थापामगर र सह–सचिवमा खिमा थापामगर निर्वाचित भएका छन् । कोषाध्यक्ष पद्का लागि पनि दुई जनाको उम्मेद्वारी परेपछि मतदानबाट नेतृत्व चयन गरिएको थियो । कोषाध्यक्षमा नन्दा बुढामगर २६ मत ल्याएर विजयी भएकी हुन् । त्यसैगरी सदस्यहरुमा विष्णु थापामगर (सैनामैना), कुस्मा पुनमगर (सिद्धार्थनगर), सरस्वती हिस्की मगर (ओमसतिया), यानु पुनमगर (तिलोत्तमा), भविसरा रानामगर (बुटवल), संगिता वलाल मगर (कञ्चन), चोलीमाया झेंडिमगर (देवदह) र दीलमाया सिंजाली मगर निर्वाचित भएका छन् ।

संघका जिल्ला अध्यक्ष चन्दा थापाको अध्यक्षतामा सम्पन्न अधिवशेनमा नेपाल मगर महिला संघका केन्द्रिय अध्यक्ष विनिता आलेमगर, बरिष्ठ उपाध्यक्ष ममता बुढाथोकीमगर, उपाध्यक्षहरु रानामगर, नेपाल मगर संघका प्रदेश ५ उपाध्यक्ष धनी आलेमगर र सदस्य संञ्जीव थापा, नेपाल आदिवासी जनजाति महासंघ जिल्ला समन्वय परिषद्, रुपन्देही अध्यक्ष शंकर गाहामगर, नेपाल मगर संघ सैनामैना नगर अध्यक्ष सुर्यविक्रम रानामगर लगायतले बोल्दै निर्वाचित समितिलाई बधाई तथा शुभकामना दिएका थिए । कार्यक्रम कुमारी पुनको स्वागत तथा सचिव केशरी गाहाको सञ्चालनमा सम्पन्न भएको थियो । अधिवेशनमा रुपन्देहीका बुटवल, तिलोत्तमा, सैनामैना लगायत ७ स्थानीय तहका मगर महिलाहरु सहभागी रहेका थिए ।

निर्वाचित पश्चात अध्यक्ष चन्दा थापाको अध्यक्षतामा बसेको कार्यसमितिको पहिलो बैठकले हालै रुपन्देहीमा एक १६ वर्षीय किशोरीमाथी भएको बलात्कार घटनाको दोषीलाई पक्राउ गरि कडा कारबाही गर्नु पर्ने माग गरेको छ । अदालतबाट पक्राउ पुर्जी जारी भइसकेको अवस्थामा पीडकलाई तुरुन्त पक्राउ गरी हदैसम्मको कारबाहीको माग गरिएको छ । १६ दिने महिला हिंसा अभियान चलिरहेको सन्दर्भ जोड्दै पीडित किशोरीको पक्षमा न्यायका लागि नेपाल मगर महिला संघ रुपन्देहीले आफ्नो तर्फबाट पैरवी गर्ने निर्णय समेत गरेको छ । दोषीलाई कुनै पनि बहानामा उन्मुक्ति दिइए आन्दोलन तथा दवावका कार्यक्रम समेत सिर्जना गरिने बैठकले निर्णय गरेको छ ।