ताजा अपडेट »

निर्यात २४ प्रतिशत बढ्दा आयात घट्यो

आइतबार, १५ मंसिर २०७६, १५ : २०
6 Shares

मंसिर १५,

काठमाडौँ । चालू आर्थिक वर्षको चौथो महिनामा पनिनेपालको निर्यात व्यापार सुधारकै गतिमा अघि बढेको छ । भन्सार विभागले सार्वजनिक गरेको तथ्यांकअनुसार अघिल्लो वर्षको तुलनामा निर्यात २३.९ प्रतिशतले बढेको छ । पहिलो चार महिनामा ३६ अर्ब २७ करोड ९० लाख रुपैयाँ बराबरको सामग्री निर्यात भएको भन्सार विभागको तथ्यांक छ ।

गत वर्षको सोही अवधिमा २९ अर्ब २८ करोड १७ लाख रुपैयाँ बराबरको सामान निर्यात भएको थियो । सोही अवधिमा आयातमा भने २४ प्रतिशतले कमी आएको हो । आयातमा कमी आएसँगै व्यापार घाटा स्वतः कम भएको छ । निर्यातमा वृद्धि र आयातमा कमी आएसँगै वैदेशिक व्यापार घाटामा सुधार हुन थालेको तथ्यांकले देखाएको छ । चालू आर्थिक वर्षको पहिलो चार महिनामा ४ खर्ब ५० अर्ब २९ करोड रुपैयाँ बराबरको विभिन्न सामान आयात भएको छ । गत वर्षको सोही अवधिमा ४ खर्ब ८३ अर्ब ७५ करोड रुपैयाँ बराबरको सामान आयात भएको थियो । चार महिनामा नेपालको व्यापारघाटा ४ खर्ब १४ अर्ब रहेको छ ।यस अवधिमा नेपालले भारतबाट सबैभन्दा धेरै २ खर्ब ७२ अर्ब ५७ करोड रुपैयाँ बराबरको सामान आयात गरेको तथ्यांक छ ।

यस्तै, यो अवधिमा नेपालले २४ अर्ब २६ करोड रुपैयाँ बराबरको सामान भारततर्फ निर्यात गरेको छ । यो आर्थिक वर्षको पहिलो चौमासिकमा भारतसँग २ खर्ब ४८ अर्ब ३० करोड व्यापार घाटा रहेको छ । विभागले सार्वजनिक गरेको तथ्यांकअनुसार ४ महिनामा कुल ४ खर्ब ८६ अर्ब ५७ करोडको व्यापार भयो । जसमध्ये निर्यात व्यापार २३.९० प्रतिशत बढेको छ । आयात व्यापार ६.९२ प्रतिशतले घटेको तथ्यांकमा उल्लेख छ । अघिल्लो वर्षको ४ महिनामा २९ अर्ब २८ करोड रुपैयाँको निर्यात भएकोमा अहिले ३६ अर्ब रुपैयाँ नाघेको छ । आयात ४ खर्ब ८३ अर्ब ७५ करोड रुपैयाँबाट झरेर ४ खर्ब ५० अर्ब २९ करोड रुपैयाँमा पुगेको छ । निर्यातमा पाम आयलको हिस्सा बढी छ ।
व्यापार विज्ञ पुरुषोतम ओझा निर्यात बढ्दै जानु र आयात कम हुनले वैदेशिक व्यापारमा सुधार आएको बताउँछन् ।

निर्यात वृद्धि भई आयातमा कमी आएकाले व्यापार घाटा कम भएको उनको भनाई छ । आयातित वस्तुमध्ये पहिलो नम्बरमा पेट्रोलियम पदार्थ छ । सो अवधिमा ५० अर्ब ५१ करोड रुपैयाँको इन्धन आयात भएको छ । तयारी कपडा पनि उल्लेख्य रूपमा आयात भएको छ । गत वर्ष १० अर्ब ९० करोड रुपैयाँको आयात भएको तयारी कपडा ४ महिनाको अवधिमा १४ अर्ब ७३ करोड रुपैयाँ पुगेको छ । यस्तै निर्यातमा पहिलो स्थानमा प्रशोधित पाप तेल ८ अर्ब ३६ करोडको निर्यात भएको छ । यस्तै धागो २ अर्ब ७९ करोड निर्यात भएको छ । तेस्रोमा क्रमश: उनी गलैंचारकार्पेट २ अर्ब ६२ करोड रुपैयाँ, तयारी कपडा २ अर्ब १६ करोड, भटमासको तेल प्रशोधित २ अर्ब २ करोड रुपैयाँको निर्यात भएको छ । ४ महिनाको अवधिमा १ अर्ब ५४ करोड रुपैयाँको अलैंची, १ अर्ब ३० करोड रुपैयाँको फलफूलको जुस निर्यात भएको उल्लेख छ ।

त्यस्तै सो अवधिमा चीनबाट ८० अर्ब १८ करोड ५८ लाख रुपैयाँ बराबरको सामान आयात गरेको छ । यस अवधिमा नेपालले जम्मा ७१ करोड रुपैयाँ बराबरको सामान चीनतर्फ निर्यात गरेको छ । पछिल्लो समय स्वदेशी वस्तुको निर्यात बढ्दै गएको र आयातमा कमी भएकाले व्यापार घाटामा कमी भएको तथ्यांले देखाएको छ । - लक्ष्मी सापकोटा / कारोबार

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।