ताजा अपडेट »

तिलोत्तमा राष्ट्रियस्तरबाटै प्लाष्टिकमुक्त क्षेत्र घोषणा हुँदै

शुक्रबार, १३ मंसिर २०७६, १७ : ४२
10 Shares

मंसिर १३,

ग्लोबल आवाज

बुटवल । रुपन्देहीको तिलोत्तमा नगरपालिकालाई राष्ट्रियस्तरबाटै प्लाष्टिकमुक्त क्षेत्र घोषणा गर्न १५ हजार विद्यार्थीहरुलाई सहभागी गराएर सामूहिक कक्षा सञ्चालन गरिने भएको छ । वातावरणसम्बन्धी आम मानिसमा चेतना फैलाउन आगामी माघ १० गते करिव दुई घण्टासम्म चल्ने सामूहिक कक्षामा स्कुल तथा कलेजका विद्यार्थीहरुलाई विश्वको बढ्दो चिन्तन जलवायू परिवर्तन सम्बन्धी प्रशिक्षण दिइने छ । कार्यक्रममा पाँचहजार बुद्धिजीवीहरुलाई समेत सहभागी गराइने छ ।

शुक्रबार मणिग्राममा आयोजित पत्रकार सम्मेलनमा वातावरणविद एवं अभियान्ता निमेश ढाकाले दिएको जानकारी अनुसार कृषिभूमि, खोला, नदी, बाटो, गल्ली, वनजंगल, खोल्सा, पोखरी, नाला लगायत सम्पूर्ण प्लाष्टिकजन्य पदार्थलाई संकलन गर्ने उद्देश्यले यो अभियान चलाइएको हो ।
रुपन्देही जिल्लाका हरेक स्कुलका विद्यार्थीहरु सहभागी हुने यो कार्यक्रममा उपस्थित विद्यार्थीले एक झोला प्लाष्टिकजन्य फोहर लिएर मात्र प्रवेश गर्नुपर्नेे छ ।

सीम नेपालको संयोजनमा करिव दुईसय स्वयंसेवकको रोहवरमा तिलोत्तमाका हरेक समुदायका अभिभावक, विद्यार्थीहरुले प्लाष्टिकजन्य फोहर संकलन सुरु गरेका छन् । त्यस्तै तिलोत्तमाका हरेक वडाका ८५ सामुदायिक तथा निजी विद्यालयमा ग्रिनरी नेपालले गरिरहेको कार्यक्रमलाई पनि निरन्तरता दिइने छ । हरेक वडाका टोलविकास समितिहरुसँग समन्वय गरी प्रत्येक बिहान सरसफाई कार्यक्रम गरिने वातावरणविद ढाकाले बताए ।

उनका अनुसार यो कार्यक्रमले गिनिज वल्र्ड रेकर्डमा दर्ता भएर विश्वकिर्तीमान कायम रहने छ । यही कार्यक्रमबाट माघ १० गते तिलोत्तमा नगरपालिकालाई प्लाष्टिकमुक्त क्षेत्र घोषणा गरिने छ । वातावरणविद ढाकाको निर्देशनमा सम्पन्न हुने यो कार्यक्रम व्यवस्थित, मर्यादित र राष्ट्रिय गौरवको बन्ने तिलोत्तमा नगरपालिकाका प्रमुख वासुदेव घिमिरेले बताए । तिलोत्तमा नगरपालिका यसअघि नै प्लाष्टिकमुक्त नगर घोषणा भएपनि राष्ट्रियस्तरमै गरिने घोषणाबाट देशव्यापी सन्देश जाने विश्वास लिएको उनले बताए ।

उक्त कार्यक्रममा वन तथा वातावरणमन्त्री शक्तिबहादुर बस्नेत, प्रदेशका उद्योग, पर्यटन, वन तथा वातावरणमन्त्री लिला गिरी, प्रदेश पाँचका नगरपालिका तथा गाउँपालिकाका प्रमुख र उपप्रमुख, सांसद, बुद्धिजीवी लगायत सहभागी हुनेछन् ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।