राजस्व छल्ने दुई फर्मविरुद्ध मुद्दा, ८७ लाख ७७ हजार बिगो माग

मंसिर १३,

काठमाडौँ । राजस्व अनुसन्धान विभागले करिब ८७ लाख राजस्व छलीको अभियोगमा दुई फर्मका सञ्चालकविरुद्ध मुद्दा चलाएको छ। विभागले ८६ लाख ७७ हजार रुपैयाँ विगो कायम गरी ती फर्मका सञ्चालकहरूविरुद्ध बिहीबार काठमाडौं जिल्ला अदालतमा मुद्दा दर्ता गरेको हो।

झुटा तथा नक्कली मूल्य अभिवृद्धि कर (भ्याट) बिल प्रयोग गरी प्रभा इन्टरप्राइजेजका सञ्चालक रामप्रसाद चौलागाईं र जिपिसी ट्रेडर्सका सञ्चालक रामकृष्ण ढकालले उक्त बिगो बराबरको राजस्व छली गरेको विभागले दाबी गरेको छ। विभागले उनीहरूबाट बिगो बराबरको रकम असुली, त्यसको दोब्बर जरिबाना र ३ वर्षसम्म कैद सजाय मागदाबी गरेको छ।

विभागका अनुसार प्रभा इन्टरप्राइजेजका सञ्चालक चौलागाईंले नक्कली बिल खरिद गरी ५९ लाख ४ हजार रुपैयाँ र अर्का प्रतिवादी ढकालले २७ लाख ७२ हजार रुपैयाँ राजस्व छली गरेको पाइएको छ।- नेपालन्युज