अमेरिकी राजदूतमाथि यौन दुराचारको आरोप

मंसिर १३,

वासिङ्टन । यूरोपियन यूनियनका लागि अमेरिकी राजदूत गोर्डोन सन्डल्याण्डमाथि तीन महिलाले यौन दुराचारको आरोप लगाएका छन् । राजदूतका लागि राष्ट्रपति डोनल्ड ट्रम्पले सिफारिस गरेका गोर्डोनमाथि महाभियोग सुनुवाइको क्रममा यसबारे प्रश्न उठेको छ ।

गोर्डोनले भने यस्तो आरोप अस्वीकार गरेका छन् । ती महिलाले आफ्नो बदनाम गराउन यस्तो आरोप लगाएको उनको जिकिर छ । द पोर्टल्याण्ड मन्थ्लीले यस अघि नै ती महिलाको नाम र आरोपबारे सामाग्री प्रकाशन गरेको थियो । जहाँ धनाढ्य सन्डल्याण्डको यौन प्रस्ताव महिलाले अस्वीकार गरेपछि उनीहरुसँग व्यवसायीक रुपमा बदला लिएको बताइएको छ । समाचार अनुसार जाना सोलिस नाम गरेकी एक महिलाले सन्डल्याण्डसँग उनको होटलमा कामको लागि २००८ मा भेटेकी थिइन् ।

सन्डल्याण्डले आफूलाई लन्च सहित भेट गरेको र होटलमा नयाँ रखैलको रुपमा जागिरको प्रस्ताव गरेको जानाको भनाइ छ । सन्डल्याण्डले आफ्नो पछाडि हत्केलाले हिर्काउँदै यस्तो शर्त र प्रस्ताव गरेको जानाको आरोप छ । साथै सन्डल्याण्डले आफूलाई पोर्टल्याण्डस्थित निजी निवासमा आर्ट कलेक्सन हेर्न निम्ता दिएको जानाको भनाइ छ । र त्यहाँ उनले पूर्वराष्ट्रपति जर्ज डब्लु बुससँगको तस्बिर देखाउँदै पूल हाउसमा आफूलाई एक्पोज गरेको उनले बताएकी छिन् । यससँगै सन्डल्याण्डले उनलाई बलपूर्वक किस गरेको पनि आरोप छ ।

यस्तै अर्की महिला निकोल भोगेलले पनि सन्डल्याण्डलाई यौन दुराचारको आरोप लगाएकी छिन् । उनले सन्डल्याण्डलाई २००३ को एक साँझ डिनर सहित भेटेकी थिइन् । जहाँ नयाँ म्यागजिनका लागि लगानी खोज्ने क्रममा निकोलले सन्डल्याण्डलाई भेटेको बताएकी छिन् । सन्डल्याण्डले मलाई आफूले किनेको होटलमा लगे । र उनको कोठा हेर्न बोलाए, जहाँ उनले मलाई अंकमाल गर्न आग्रह गरे । पछि मेरो अनुहार समातेर मलाई किस गर्न लागे, निकोलले भनेकी छिन् ।

निकोलले भने आफूले इन्कार गर्दै त्यस ठाउँ छोडेको बताएकी छिन् । निकोलले आफ्नो इमेल दिए पनि सन्डल्याण्डले आफ्नो प्रोजेक्टमा लगानी गर्न अस्वीकार गरेको बताएकी छिन् । सन्डल्याण्डले एक विज्ञप्ति जारी गर्दै ती सबै आरोप अस्वीकार गरेका छन् । भोगेलले पोर्टल्याण्ड मन्थ्ली प्रकाशन गर्दै आएकी छन् । जहाँ उनले आर्टिकल लेखेकी छिन् । – एजेन्सी