‘वैज्ञानिक कृषि प्रणाली लागू गरी मुलुकलाई समृद्ध बनाउँछौं ’

मंसिर ७,

ग्लोबल आवाज

तिलोत्तमा । नवनियुक्त कृषि तथा पशुपन्छी मन्त्री घनश्याम भुसालले आफ्नो मन्त्रालयमा तत्काल कुनै नयाँ योजना नल्याएर चालु वर्षको नीति तथा कार्यक्रमहरुलाई नै राम्रोसँग कार्यान्वयन गर्ने जानकार गराएका छन् । आगामी वर्षकोबजेटमा मात्रै आफूले कृषि क्षेत्रको विकासका लागि नयाँ नीति तथा कार्यक्रम ल्याउने बताए ।

मन्त्री भएपछि पहिलो पटक गृह जिल्ला रुपन्देही आएका भुसालले आज मणिग्राममा आयोजित कार्यकर्ता भेटघाट कार्यक्रममा बोल्दै निर्वाहमुखी र परम्परागत खेती प्रणालीलाई तोडेर बैज्ञानिक र व्यवसायिक खेती प्रणाली मार्फत मुलुकलाई समृद्ध बनाउनेतर्फ आफूले सक्दो प्रयास गर्ने प्रबिद्धता जनाए । प्रधानमन्त्री केपी शर्मा ओलीले कृषिमा धेरै समस्या छन् तपाइले कृषि मन्त्रालय सम्हालिदिनु प¥यो भनेका कारण आफुले त्यसलाई सहज रुपमा स्विकार गरेको जानकारी दिदै मन्त्री भुसालले डर र प्रलोभनमा परेर काम नगर्ने समेत प्रष्ट पारे ।

आफूले सम्हालेको मन्त्रालयले मुलुकको समृद्धिमा ठूलो प्रभाव पर्ने भन्दै मन्त्री भुसालले पुरानै पद्धतिको कृषि प्रणालीमा आमूल परिवर्तन ल्याउनुपर्ने आवश्यकता औल्याए । विकास गर्नु कठिन काम भएको भन्दै उनले कठिन काम भए पनि असम्भव भने नरहेको बिचार व्यक्त गरे ।