बुटवलको तिनाउ अस्पतालमा बिरामीको मृत्यु प्रकरण : विवाद अझै मिलेन, आज पनि दुई पक्षबीच छलफल

बुटवल । रुपन्देहीको बुटवलमा अवस्थित तिनाउ ईन्टरनेशनल अस्पतालमा बिरामीको उपचारका क्रममा मृत्यु भएपछि उत्पन्न विवादको अझै टुङ्गो लागेको छैन । खुट्टाको अपरेशन गर्न आएको एक बिरामीको बुधबार मृत्यु भएपछि आफन्तले बिरोध गर्दै क्षतिपूर्तिको माग गरेका छन् । मृतकका आफन्त र अस्पताल प्रशासन बीच बुधबार साझसम्म भएको वार्तामा सहमति नजुटेपछि आज पुनः छलफल गर्ने तयारी भएको अस्पताल प्रशासनले जनाएको छ ।

नवलपरासीको बर्दघाट नगरपालिका–११ भगजोगनीका ४२ वर्षीय ताराप्रसाद चौधरीको देब्रे खुट्टाको अप्रेसनका क्रममा बुधबार बिहान मृत्यु भएको थियो । अस्पतालका डाक्टरको लापरवाहीले उनको मृत्यु भएको भन्दै आफन्तहरुले घटनाको छानवीन, दोषीलाई कारबाही र क्षतिपुर्तिको माग गरेका छन् । मृतकका आफन्तले माग पूरा नभएसम्म शव नबुझ्ने अडान लिएका छन् ।

बुधबार भएको छलफलमा मृतकका आफन्तले चिकित्सकहरुको लापरबाहीका कारण घटना भएको दाबी गरेपनि त्यस्तो नभएको अस्पतालले बताउँदै आएको छ । अस्पतालका अध्यक्ष चिरञ्जिवी जोशीले उपचारमा चिकित्सकको कुनै पनि कमजोरी नभएको दाबी गरे । सहमतिका लागि भएको छलफलमा मृतकका आफन्तहरुले उपचारमा संलग्न चिकित्कसको कमजोरी देखाएपनि त्यस्तो नभएको र कुनै पनि कानूनी उपचारमा जानका लागि चिकित्सक तथा अस्पताल तयार भएको अडान कायम रहेको जोशीले बताए । बुधबारको छलफलमा भएका विषयहरु बारे खुलेर बोल्न नचाहेका उनले आज पनि आफन्तहरुसँग छलफल हुने ग्लोबल आवाजलाई जानकारी दिए । छलफलमा सहभागी एक सदस्यका अनुसार मृतकका आफन्तले २५ लाख रुपैयाँ क्षतिपूर्तिको माग गरेका छन् भने अस्पताल प्रशासनले सो अनुसार रकम दिन तयार नभएको जनाएको छ । घटना बारे थप जानकारी लिनका लागि उपचारमा संलग्न डा. योगेन्द्र अग्रहरीसँग कुराकानी गर्न पटक–पटक फोन गर्दा पनि उनले जबाफ फर्काएका छैनन् ।

‘सोमबार अस्पताल भर्ना भएका चौधरीलाई मंगलबार सांझ साढे ५ बजेपछि शल्यक्रिया कक्षमा लगिएको थियो । ताराप्रसादको डा. योगेन्द्र अग्रहरी नेतृत्वको टिमले शल्यक्रिया गरेका हुन् । ३–४ घण्टामा अप्रेसन सकिन्छ भनिएको तर राति ११ बजे मात्रै अप्रेसन थियटरबाट निकालेर आईसीयूमा लैजान खोजेपछि शंका लागेर सोध्दा अवस्था नर्मल छ आत्तिनुपर्दै भनेका र फेरि ५ बजेतिर बोलाएर अवस्था सिरियस छ भेन्टिलेटरमा राखेर हेरौं भनेको केहीबेरमै बिरामीको मृत्यु भएको खबर गरियो ।’-मृतकका आफन्तले भने । ४ वर्ष अघि दुर्घटनामा खुट्टा भांचिएकाले ताराप्रसादको खुट्टामा रड राखिएकोमा रडको नट भांचिएपछि अप्रेसन गर्न भर्ना भएका थिए ।

यस अघि पनि तिनाउ अस्पतामा बिरामीको मृत्यु भएपछि विवादित बनेको थियो । गत वर्षको चैत्रमा रुपन्देही सैनामैना सालझण्डीकी ४० वर्षिया पार्वती घिमिरेको चिकित्सकको लापरबाहिका कारण मृत्यु भएको भन्दै आफन्तले बिरोध गरेका थिए ।