पेट्रोलियम पदार्थमा भएको मूल्यवृद्धिको विरोधमा बुटवलमा विरोध

बुटवल । पेट्रोलियम पदार्थमा भएको मूल्यवृद्धिको विरुद्ध अनेरास्ववियू बुटवल बहुमुखि क्याम्पसले विरोध प्रद्धर्शन गरेको छ । नेपाल आयल निगमले बिहीबार रातिदेखि लागू हुनेगरी पेट्रोलियम पदार्थ तथा ग्यासमा गरेको मूल्यवृद्धिको विरोध गर्दै फिर्ता गर्ने मागसहित अनेरास्ववियूले बुटवल बहुमुखि क्याम्पस गेट अगाडी एक घण्टा चक्का जाम गरेको हो ।

निगमले डिजेल, पेट्रोल र मट्टितेलको भाउ प्रतिलिटर ३ रुपैयाँ बढाएको छ । यससँगै पेट्रोलको भाउ प्रतिलिटर १३६ पुगेको छ भने मट्टीतेल र डिजेलको भाउ ११९ रुपैयाँ पुगेको छ । यसअघि निगमले गत कात्तिक १२ गते पनि डिजेल, पेट्रोल र मट्टितेलको मूल्य बढाएको थियो ।

इन्धनको मूल्य बढाएर सरकारले जनताको ढाड सेक्ने काम गरेको भन्दै अनेरास्ववियू बुटवल बहुमुखी क्याम्पसले मूल्यवृद्धि तुरुन्त फिर्ताको माग गरेको छ । सरकारले मूल्यवृद्धि फिर्ता नलिए कडा आन्दोलन गरिने क्याम्पस कमिटी अध्यक्ष गोबिन्द रिजालले बताए ।