बुटवल । नेपाली कांग्रेसका केन्द्रीय सदस्य, पूर्वमन्त्री तथा सांसद मीनबहादुर विश्वकर्माले केन्दीय समितिले तय गरेको कार्यतालिका अनुसार नै महाधिवेशन सम्पन्न गर्ने बताएका छन् । शनिबार नेपाली कांग्रेस बुटवल उपमहानगर–११ द्धारा बुद्धनगरमा आयोजित बृहत पार्टी प्रवेश कार्यक्रमलाई सम्बोधन गर्दै विश्वकर्माले समयकै महाधिवेशन सम्पन्न गरि पार्टीको वैधानिकता जोगाउँने बताए ।

विश्वकर्माले भने,– ‘जुन ठाउँमा वडा अधिवेशन गर्न बाँकी छ, वडा अधिवेशन गरौं । जुन ठाउँमा पालिका अधिवेशन गर्न बाँकी छ, पालिका अधिवेशन गरौं । जुन ठाउँमा क्षेत्रीय अधिवेशन गर्न बाँकी छ, त्यहाँ पनि गरौं । सोही अनुसार गर्दै गयौं भने केन्द्रीय महाधिवेशन पनि सम्पन्न गर्छौ ।’

उनले सहमतिबाट निर्णय गर्ने भन्ने कुराले केन्द्रीय महाधिवेशन गर्न ढिलाई भएको औल्याए । उनले भने,– ‘हामिले सहमति बाट निर्णय गर्ने भन्यौं । केन्द्रीय कार्यसमितिको निर्णय सहमतिबाट, अनुशासन समितिको निर्णयको सहमतिबाट निर्वाचन समितिको निर्णय सहमतिबाट, हुँदाहुँदै क्रियाशील छानबिन समितिको निर्णय पनि सहमतिबाट गरेपनि सहमति त स्वभाविक हिसाब नै ढिलो हुने भो । त्यस कारण हाम्रोमा बिलम्ब भएको छ, ढिलो भएको छ तर गलत भएको छैन् ।’

नेता विश्वकर्माले आगामी निर्वाचनमा काँग्रेसले कसैसँग सहकार्य नगर्ने बताए । उनले आगामी निर्वाचनमा पार्टीलाई एकढिक्का बनाएर अगाडी लैजाने बताउँदै कसैसँग पनि सहकार्य नगरी एक्लै चुनाव जित्ने दाबी गरे । ‘आउने चुनावमा पार्टीलाई एकढिक्का बनाएर हामि कसैसँग पनि सहकार्य नगरी एक्लै चुनाव जित्छौं ।’, उनले भने ।

विश्वकर्माले थपे, ‘एक्लै लड्दा खेरी हामिले अर्को चुनाव चिन्हमा मतदान गर्नुपर्दैन् । हाम्रो बानी बिग्रीदैन । त्यसो गर्नको लागि कांग्रेससँग एकता गर्नुपर्छ । कांग्रेसभित्रै एकता गर्नु जरुरी छ । एकता भयो भने मात्रै कांग्रेसले चुनाव जित्छ ।’

कार्यक्रममा काठमाडौं महानगरको उपमेयर हरिप्रभा खड्की, महासमिति सदस्यहरु युवराज गिरी, रामबहादुर कार्की, काजिमान श्रेष्ठ, बालकुमारी भण्डारी, क्षेत्र नं. २ का सभापति हरि लम्साल, कांग्रेस बुटवल उपमहानगर सभापति खेलराज पाण्डेय लगाएतले कांग्रेसलाई गतिशील बनाउन साथै समृद्ध मुलुक निर्माणको लागि हातेमालो गरेर अगाडि बढ्नेमा जोड दिए । कांग्रेस बुटवल–११ का सभापति जितबहादुर मल्लको अध्यक्षता, सचिव यज्ञ न्यौपानेको सञ्चालनमा सम्पन्न भएको थियो ।