मेस्सीले पिएसजीबाट डेब्यु गर्दा ‘एमएमएन ट्रिओ’ मैदानमा

एजेन्सी । अर्जेन्टिनी फुटबल टिमका कप्तान लिओनेल मेस्सीले फ्रान्सेली क्लब पेरिस सेन्ट जर्मेन (पिएसजी)बाट आज डेब्यु गर्ने भएका छन् ।पिएसजीले लिगको चौथो खेलमा आज राइम्सविरुद्ध खेल्दैछ । खेल नेपाली समयअनुसार मध्यरात १२:३० बजे हुनेछ ।

Advertisement

लियोनल मेस्सीलाई समावेश गर्दै पेरिस सेन्ट जर्मेन (पीएसजी) ले रेइम्सविरुद्ध खेल्ने टिम घोषणा गरेको छ। पीएसजीले घोषणा गरेको २२ सदस्यीय टिममा मेस्सी अटाएका हुन्। अर्जेन्टिनाका कप्तान मेस्सीले अघिल्ला तीन खेलमा मौका पाएका थिएनन् । मेस्सीसँगै केलियन एमबाप्पे, नेयमार पनि टिममा रहेका छन्। पिएसजीमा पहिलो पटक तीनै स्टार एकसाथ मैदानमा देखिने भएका छन् ।

मेस्सी पीएसजीमा अनुबन्ध भएपछि फ्रेन्च क्लबमा नयाँ ‘अट्याकिङ ट्रिओ’ बनेको छ । पीएसजीमा मेस्सी, एमबाप्पे र नेयमारको ‘एमएमएन’ को ‘ट्रिओ’ बनेको छ  । यो ‘ट्रिओ’लाई विश्व फुटबलकै उत्कृष्ट आक्रामक अग्रपंक्तिको रुपमा आंकलन गरिएको छ । शिक्षक माउरिसियो पोचेटिनोले मेस्सी पहिलो पटक पिएसजीको टोलीमा हुने पक्का गरेका छन् । तर उनी सुरुवातबाट खेल्छन् वा बेन्चमा रहन्छन् भन्ने यकिन भएको छैन । 

अगस्ट १० मा अनुबन्धित भएका मेस्सीले हालसम्म कुनै खेलमा टोलीमा स्थान बनाएका छैनन् । उनको म्याच फिटनेस नभएका कारण नै उनलाई तयार हुन समय दिइएको प्रशिक्षक पोचेटिनोले बताउँदै आएका छन् । मेस्सीले कोपा अमेरिका उपाधि जितेपछि झन्डै एक महिना विश्राम लिएका थिए । पिएसजीमा अनुबन्धित भएपछि भने उनी पछिल्लो दुई सातायता नियमित प्रशिक्षणमा छन् ।

झन्डै डेढ महिनायता प्रतिस्पर्धात्मक खेल नखेलेका कारण पनि मेस्सीले आज पूरा समय नखेल्ने सम्भावना छ । उनी दोस्रो हाफमा वैकल्पिक खेलाडीका रुपमा मैदान प्रवेश गर्दै डेब्यु गर्न पनि सक्छन् । पिएसजीले नेयमार र मेस्सीबिना पनि लिगको सुरुवाती तीन खेलमा शत प्रतिशत जितको सुरुवात गरेको छ । एम्बापपेले तीनै खेलमा प्रभावशाली प्रदर्शन गरेका छन् ।

राइम्सले यस सिजन खेलेका तीनै खेलमा बराबरी खेल्दै ३ अंक जोडेको छ । पिएसजी भने ९ अंकसहित शीर्ष स्थानमा छ ।