ताजा अपडेट »

लुम्बिनी प्रदेशको विशेष अधिवेशन: सत्तारुढ दल रणनीति तयार पार्न बैठक बस्दै

बुधबार, २७ साउन २०७८, ०८ : २६

बुटवल । लुम्बिनी प्रदेशका मुख्यमन्त्री शंकर पोखरेलविरुद्ध दर्ता भएको अविश्वासको प्रस्तावमाथि छलफलका लागि प्रदेशसभाको विशेष अधिवेशन आज दिउसो बस्दै छ । विपक्षी गठनबन्धनका नेपाली कांग्रेस, नेकपा (माओवादी केन्द्र), जनता समाजवादी पार्टी र राष्ट्रिय जनमोर्चाले गत साउन १९ गते प्रदेश सभा सचिवालयमा अविश्वासको प्रस्ताव दर्ता गर्नुका साथै प्रदेश प्रमुखसमक्ष विशेष अधिवेशन डाक्न समावेदन दिएका थिए ।

प्रदेश प्रमुख अमिक शेरचनले आज दिउसो १ बजेका लागि बैठक आह्वान गरेका छन् थिए । बैठकमा विपक्षी दलले मुख्यमन्त्रीविरूद्ध अविश्वासको प्रस्ताव पेश गर्ने भएपछि नेकपा एमाले संदीय दलको बैठक अहिले विहान मुख्यमन्त्री निवासमा बसिरहेको छ । अविश्वासको प्रस्तावको सामना गर्ने वा अविश्वास प्रस्तावको सामना गर्ने बारे छलफल हुने एक नेताले जानकारी दिए ।

यसअघि मुख्यमन्त्री पोखरेल विरुद्ध विपक्षी गठबन्धनले वैशाख ६ र २६ गते पनि अविश्वासको प्रस्ताव दर्ता गरेका थिए । ६ गते दर्ता गरेको अविश्वासको प्रस्तावमाथि छलफल गर्न बैठक बोलाएकै दिन वैशाख १९ गते मुख्यमन्त्रीबाट पोखरेलले राजीनामा दिएर एमालेको एकल बहुमत दाबी गर्दै पुनः मुख्यमन्त्रीमा नियुक्त भएका थिए ।

वैशाख २६ मा दोस्रोपटक अविश्वासको प्रस्ताव दर्ता भए पनि तत्कालीन प्रदेश प्रमुख यादवले आवश्यक नरहेको भन्दै विशेष अधिवेशन आह्वान गरेका थिएनन् । त्यसयता सत्तारूढ दल एमाले र विपक्षीबीच साँसद तानातान चलिरहेको छ । लुम्बिनीमा हाल कायम प्रदेशसभा सदस्यहरुको संख्या ८० मध्ये सत्तारुढ दल एमालेका ३८ सांसद छन् । बहुमतका लागि ४१ सांसदको समर्थन आवश्यक पर्छ । विपक्षी दल नेपाली कांग्रेस १९, नेकपा माओवादी केन्द्र १८, जनता समाजवादी पार्टी ३ र राष्ट्रिय जनमोर्चाका १ गरी ४१ सांसद छन् ।

बहुमतका लागि सांसदहरु किनबेच तथा तानातानको स्थितीमा आफ्ना सांसदहरु जोगाउन विपक्षी गठबन्धनले सदस्यहरुलाई विभिन्न रिसोर्टहरुमा अस्तिदेखि नै लुकाएर राखेका छन् । सोमबारदेखि विभिन्न रिसोर्टमा लुकाउँदै राखिएका विपक्षी दलका सांसदहरु आजमात्रै बुटवल आउने कार्यक्रम रहेको छ ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।