लायन्स क्लब भैरहवा ग्रिनसिटिद्वारा मृगाैला पीडितलाई आर्थिक सहयोग

भैरहवा । लायन्स क्लब अफ भैरहवा ग्रिनसिटिले वर्ष २०२१/०२२ को कार्यक्रम मृगौला पीडितलाई आर्थिक सहयोग गरी सुरु भएको छ । आर्थिक अभाबको कारण मृगौला उपचारमा समस्या परेका भैरहवा निवासि प्रविण परियारलाई ५१ हजार सहयोग गर्दै नयाँ आर्थिक वर्षको कार्यक्रम सुरु भएको हो ।

सिद्धार्थनगर नगरपालिका-९ भाग्यपथमा कोठा भाडा लिई परिवार सहित बस्दै आएका परियारको केही महिना अगाडि मृगौलाले काम गर्न छाडेको थियो । मृगौलाले काम गर्न छाडेपछि उनले आफूसँग भएको सबै जायजेथा र रकम खर्चेर उपचार गराउँदा समेत अहिलेसम्म निको हुन सकेको छैन । परियारलाई यतिबेला मृगौलाको डायालासिस र औषधि खरिद गर्न पनि हम्मे-हम्मे परेपछि ईरफान वारिसको सक्रियता तथा संयोजनमा ग्रिनसिटिले आफ्ना सदस्यहरुले दिएको सहयोग रकम संकलन गरि हस्तान्तरण गरेको हो ।

वर्ष २०२१/०२२ का अध्यक्ष गोबिन्द प्रसाद गिरिको ‘समाजको लागि संगसंगै’ भन्ने मुल नाराका साथ यस वर्ष भैरहवा ग्रिनसिटि सामाजिक अभियानमा होमिएको छ । सहयोग हस्तान्तरण कार्यक्रममा लायन्स क्लब अफ ३२५ बिटुका द्वितीय उपगभर्नर पिएमजिफ नबराज न्यौपानेले मानवीय सेवामा लायन्सहरुको भिडमा ग्रिनसिटिको काम उल्लेखनीय रहेको बताए । उनले भने, ‘स्थापनाको पहिलो वर्षमै मानवीय कार्यक्रम गरेकै कारण विभिन्न अवार्ड पाएको लायन्स क्लबअफ भैरहवा ग्रिनसिटिले यो वर्ष पनि महत्वपूर्ण काम गरेर गत वर्ष जस्तै रेकर्ड कायम गर्ने विश्वास लागेको छ ।’ उनले प्रविणको उपचारको लागि गरिएको सहयोगले औषधि उपचारमा केही सहज हुने अपेक्षा व्यक्त गरे ।

कार्यक्रममा स्थानीय बासिन्दा समेत रहेका लायन्स क्लब अफ ३२५ बिटुका उपसचिव विजय पान्डेले मानवीय सेवाभावले ओतप्रेत भएका सदस्यहरुको सहभागिता रहेको लायन्स क्लब अफ भैरहवा ग्रिनसिटिले आर्थिक समस्याको कारण उपचार गराउन कठिनाई ब्यहोरिरहेका प्रविणको घरमै पुगि सहयोग गर्नु उदाहरणीय कर्म भएको बताए । वर्ष २०२१/०२२ का अध्यक्ष गोबिन्द प्रसाद गिरिले लायन्स सामुहिक भावले सन्चालित हुनेहुँदा ग्रिनसिटिले यस वर्ष समाजको लागि संगसंगै भन्ने थिम राखेको बताए ।