अस्पतालमा अक्सिजन अभाव हुन नदिन यसरी काम गर्दैछ सरकार

काठमाडाैं । सरकारका विभिन्न निकायले गत २४ घण्टामा १६ हजार ३१९ सिलिन्डर अक्सिजन भरेर वितरण गरेको छ ।सरकारका मुख्यसचिव शंकरदास वैरागीले गत सोमवार सातै प्रदेशका प्रमुख सचिवलाई कुनै पनि स्थानमा अक्सिजन अभाव हुन नदिन निर्देशन दिएका थिए । सोहीअनुसार अभाव भएका स्थानमा तीव्रतासाथ अक्सिजन पुर्‍याइरहेको प्रधानमन्त्री तथा मन्त्रिपरिषद् कार्यालयका प्रवक्ता किरणराज शर्माले जानकारी दिए ।

प्रधानमन्त्री कार्यालयकै निर्देशनअनुसार उद्योग, वाणिज्य तथा आपूर्ति मन्त्रालयले गत २४ घण्टामा उपत्यका भित्रका ९ उद्योगबाट ८ हजार १२३ र बाहिरका १९ अक्सिजन उद्योगबाट ८ हजार १९८ गरी कूल १६ हजार ३१९ सिलिन्डरमा अक्सिजन भरेर विभिन्न अस्पतालमा वितरण गरेको छ ।

प्रवक्ता शर्माका अनुसार मंगलवारसम्म औद्योगिक तथा अन्य प्रयोजनमा रहेका थप ४ हजार ८३२ सिलिन्डर संकलन भई सम्बन्धित उद्योगमा फिर्ता पठाइएको छ । स्थानीय प्रशासनले विभिन्न अस्पताललाई ७ हजार ७२६ अक्सिजन सिलिन्डर वितरण गरेको पनि उनले जानकारी दिए ।

कोभिड संक्रमितको उपचारार्थ डेडिकेटेड रूपमा देशभर ३८२ अस्पताल रहेकामा ४ थप भई ३८६ सञ्चालनमा छन् । ती अस्पतालमा १७ हजार सामान्य बेड प्रबन्ध गरिएको छ । पछिल्ला दिन देशभर सामान्य बेड संख्यामा उल्लेख्य वृद्धि भएको पाइएको छ । संक्रमितको विशेष उपचारका लागि २ हजार ५०० एचडीयू बेड, अघिल्लो दिनको तुलनामा थप ९ सहित १ हजार ९९९ आईसीयू र ६०० भेन्टिलेटर प्रबन्ध गरिएको छ ।

प्रधानमन्त्री कार्यालयका अनुसार देशका हरेक स्थानमा अक्सिजन कम हुन नदिन प्रमुख जिल्ला अधिकारीलाई समेत आवश्यक पहल गर्न निर्देशन दिइएको छ । कुनै समस्या परेका तत्काल जानकारी केन्द्रमा दिनुपर्ने र केन्द्रले आवश्यक सहजीकरणसहित समस्या समाधान नीति अख्तियार गरेको छ ।
प्रधानमन्त्री कार्यालयले सातै प्रदेशका प्रमुख सचिवमार्फत कोभिड नियन्त्रण र उपचारबारे भइरहेका गतिविधि नियमित अनुगमन समेत गरिरहेको छ । राजधानी दैनिकमा खबर छ ।