अक्सिजन उत्पादन बढाउन सैनिक जनशक्ति परिचालन

बुुटवल । पूर्ण रूपमा सञ्चालनमा आउन नसकेका ५ वटा अक्सिजन प्लान्टको उत्पादन क्षमता बढाउन आवश्यक सहयोगका लागि नेपाली सेनाले प्राविधिक सैनिक जनशक्ति खटाएको छ ।

काठमाडौंको थानकोटको अक्सटिच, काभ्रेको पनौतीको नवज्योति, रुपन्देहीको छिपागढको शंकर अक्सिजन, ठुटीपीपलको लुम्बिनी र लुम्बिनी अक्सिजन प्लान्ट सञ्चालनका लागि जनशक्ति खटाइएको हो ।

सैनिक जनसम्पर्क तथा सूचना निर्देशनालयका अनुसार कोभिड–१९ संक्रमण नियन्त्रण तथा व्यवस्थापन केन्द्र (सीसीएमसी) सँगको सहकार्यमा अधिकृतको कमान्डमा ५० जनाको दक्ष जनशक्ति खटाइएको छ । थानकोटस्थित अक्सटिच अक्सिजन प्लान्टको ८० घनमिटर क्षमता छ ।

प्लान्टको उत्पादन क्षमता बढाउन आवश्यक सहयोगका लागि सात जना खटाइएको छ । पनौतीस्थित नवज्योतिमा रहेका दुइटा प्लान्टको उत्पादन क्षमता १५० घनमिटर रहेको छ । त्यसका लागि आठ जना सैनिक जनशक्ति पठाइएको सेनाले जनाएको छ ।

रुपन्देही छिपागढको शंकर अक्सिजन प्लान्टको दैनिक ५५०, ठुटीपीपलस्थित लुम्बिनीले दैनिक २८८ र बागदुरास्थित लुम्बिनीको पनि २८८ गरी १ हजार १२६ सिलिन्डर उत्पादन क्षमता रहेको छ ।

सैनिक प्रवक्ता सन्तोषबल्लभ पौडेलले यी ३ वटा अक्सिजन प्लान्टको उत्पादन क्षमता बढाउन आवश्यक सहयोगका लागि अधिकृत तहको कमान्डमा ३५ जना खटाइएको जानकारी दिए ।अक्सिजनको उत्पादन बढेसँगै कोरोना संक्रमितको उपचारमा सहज हुने अपेक्षा गरिएको छ ।

यसैबीच, सेनाले हवाई र स्थलमार्गबाट गरी ९३० अक्सिजन ग्यास सिलिन्डर ढुवानी गरेको छ । काठमाडौंमा अक्सिजनको अभाव भएपछि विराटनगर, इटहरी, पोखरा, बारा लगायतका क्षेत्रबाट काठमाडौं ल्याइएको हो । गोरखापत्र दैनिकमा खबर छ ।