पृथ्वी चन्द्र अस्पतालमा एचडियु सेवा सुरु गर्न १५ लाख बजेट

परासी । पश्चिम नवलपरासीको परासी स्थीत जिल्लाकै ठूलो अस्पतालको रुपमा रहेको पृथ्वी चन्द्र अस्पतालमा दैनिक कोरोना संक्रमितको मृत्यु हुँदै आएको छ । तर अझै पनि अस्पतालमा सामान्य अक्सिजन सुविधा बाहेक अन्य सुविधा विस्तार हुन सकेको छैन् । अस्पतालमा एक महिनाको अवधिमा झण्डै २० जनाको मृत्यु भईसकेको छ ।

अधिकांशलाई उच्च गति अर्थात एचडियुबाट अक्सिजन दिनुपर्ने अवस्था छ तर अस्पतालमा त्यो व्यवस्था नहुँदा कतिपय संक्रमितले अकालमा ज्यान गुमाउनु परेको छ । अस्तालमा उच्च गतिको अक्सिजन सेवाको लागी तयारी भएपनि बजेट अभाव रहेको अस्पताल व्यवस्थापन समितको भनाई छ । यसै क्रममा सोबार मात्रै लुम्बिनी प्रदेश सरकारले पृथ्वी चन्द्र अस्पतालमा एचडियु सेवा सञ्चालनका लागी १५ लाख रुपैयाँ बजेट निकासा गरेको छ ।

एचडियु सेवा संञ्चालन र कोरोना संक्रमितको व्यवस्थापनका लागि भन्दै १५ लाख रुपैयाँ प्राप्त भएको अस्पताल विकास समितिका अध्यक्ष जगदिश चौधरीले जानकारी दिए तर सो रकम एचडियु सहितको सेवा विस्तारका लागी अप्रर्याप्त रहेको उनको भनाई छ ।
एक करोड बढिको बजेट माग गरिएको थियो । त्यसमा पनि घटाएर ७० लाख रुपैयाँ प्राप्त हुने चर्चाका बीच सोमबार १५ लाख रुपैयाँ मात्रै प्राप्त भएपछि अस्पतालमा सेवा विस्तारमा समस्या हुने व्यवस्थापन समितिको भनाई छ ।