रोटरी भैरहवाद्वारा आइसोलेशन सेन्टरलाई करिब ५ लाखका स्वास्थ्य उपकरण सहयोग

बुटवल । नयाँ भेरियण्टको कोरोना संक्रमण वृद्धिलाई मध्यनजर गर्दै रोकथाम र नियन्त्रणका लागि सिद्धार्थनगर नगरपालिकाले सञ्चालन गरेको आइसोलेशन सेन्टरलाई रोटरी क्लब अफ भैरहवाले स्वास्थ्य उपकरण सहयोग गरेको छ । रुपन्देहीमा देखिएको अक्सिजन अभाव र अभावबाट धेरैले ज्यान गुमाएको अवस्थालाई नियन्त्रण गर्न सहयोगका लागि ४ लाख ७५ हजार बराबरका सामग्री प्रदान गरेको रोटरी क्लब अफ भैरहवाका चार्टड प्रेसिडेण्ट राजकुमार गुप्ताले बताए ।

रोटरी क्लब अफ लुम्बिनीको सहकार्यमा क्लबले उक्त सामग्री क्लबले सोमबार नगरपालिका उपप्रमुख उमा काफ्लेलाई हस्तान्तरण गरेको गुप्ताले जनाए । रोटरी क्लब अफ भैरहवाका पूर्व अध्यक्ष सञ्जिव शर्माको संयोजनमा कार्यक्रम भएको थियो । सहयोग स्वरुप रोटरीले अक्सिजन ३ लाख ७५ हजारको कन्सन्ट्रेशन मेसिन र ४ सय लिटर क्षमताका १ लाख बरारबरका डिसइन्फेक्सन मेसिन प्रदान गरेको जनाएको छ । सहयोग हस्तान्तर कार्यक्रममा सिद्धार्थनगर –८ का राजेन्द्रजङ्ग राणा, नगरका अधिकृत दुश्यन्त कुमार थापाको सहभागिता रहेको थियो ।