अन्नपूर्ण पोस्टका २८ पत्रकारले दिए सामुहिक राजीनामा

काठमाडौँ । नेपाल न्युज इन्टरनेशनल प्रा.लि.बाट प्रकाशन हुँदै आएको अन्नपूर्ण पोस्ट पत्रिकामा कार्यरत २८ पत्रकारहरूले सामुहिक राजीनामा दिएका छन्। उनीहरूले २०७८ साल वैशाख ३ गतेदेखि लागू हुने गरी २०७७ चैत ३ गते सामूहिक राजीनामा दिएका हुन्। सम्पादक अखण्ड भण्डारीले फागुन २० गते बेलुका ६ बजे बैठक राखेर र फागुन २५ गते अपरान्ह साढे ४ बजे अर्को बैठक राखेर राजीनामा दिन दवाव दिएको सामुहिक राजीनामा पत्रमा उल्लेख छ।

‘अखण्ड भण्डारीले २०७७ फागुन २० गते साँझ ६ बजे मिटिङ छ भनी आफ्नो कार्यकक्षमा बोलाएर सबैलाई पत्रिका बन्द गरी डिजिटाइजमा जाने निर्णय भएको र सबै जनाले राजीनामा दिनुपर्ने भनी माथिको निर्देशन आएको सूचना दिएर राजीनामा गर्न लगाएका हुन्,’ पत्रकारहरूले राजीनामापत्रमा लेखेका छन्‌, ‘श्रमजीवी पत्रकारले पाउनु पर्ने सेवासुविधा, न्यूनतम् पारिश्रमिक लगायतको व्यवस्था रहेकामा कोरोनाकालदेखि काटिएको तलबको भुक्तानी, गत दशैं तिहारमा प्राप्त गर्नुपर्ने एक महिनाको पारिश्रमिक बराबरको चाडपर्व भत्ता, श्रमिक कटौती गर्दा श्रमजीवी पत्रकारलाई दिइनु पर्ने क्षतिपूर्ति, उपदान, सञ्चयकोष, उपचार खर्च, सञ्चित बिरामी बिदा र घर बिदाको रकम लगायत कानूनअनुसार प्रदान गर्नुपर्ने सम्पूर्ण सुविधासहित हिसाबकिताब गरी भुक्तानीको व्यवस्था मिलाउन पनि अनुरोध गर्दछौं।’

पत्रिका बन्द गरी अनलाइनमा जाने निर्णय भएकोले सबै जनाले राजीनामा दिनुपर्ने माथिको आदेश आएको सम्पादक भण्डारीले बताउने गरेको दाबी सामुहिक राजीनामा दिएका पत्रकारहरूको छ। लामो समयदेखि सेवा सुविधा नदिएको भन्दै अन्नपूर्णले पत्रकारहरू यसअघिदेखि नै आन्दोलित थिए। यसबीचमा केही पत्रकारहरू बाहिरिएका थिए। कोभिडका कारण आधा तलब दिएको संस्थाले पुसबाट कार्यालयमा नै बोलाएर काम गराएपनि पत्रकारहरूलाई पूरा तलब नदिएको एक पत्रकारले जानकारी दिए।