भोजपुरीमा कार्यक्रम सञ्चालन गर्ने सञ्चारकर्मी श्रेष्ठको निधन

परासी । नेवार समुदायमा जन्मे,हुर्केर पनि पश्चिम नवलपरासीको सामुदायिक रेडियो परासीमा भोजपुरी भाषामा अत्यन्त मिठासपूर्ण शैलीमा कार्यक्रम सञ्चालन तथा विज्ञापनमार्फत आवाजले मोहित पार्न सक्ने रेडियोकर्मी धनेश्वर श्रेष्ठको निधन भएको छ। बालापनदेखि नै परासीको स्थानीय बासिन्दा रहेको हुनाले यहाँको स्थानीय भाषामा बोल्न सक्ने रेडियोकर्मी धनेश्वर श्रेष्ठको भोजपुरी आवाज रेडियोमा गुञ्जिदा छुट्याउन सकिन्थ्यो।

श्रेष्ठलाई पश्चिम नवलपरासीका पत्रकारिता गर्नेहरूले भोजपुरी आवाजका निम्ति प्रेरणाको रुपमा लिने गरेका छन्। पश्चिम नवलपरासीमा रहेको पहिलो सामुदायिक रेडियो परासीका शेयर सदस्य तथा रेडियोको स्थापना कालदेखि नै विज्ञापन शाखा प्रमुखको रुपमा कार्यरत मिलनसार तथा सरल स्वाभावका धनी धनेश्वर श्रेष्ठको असामयिक निधनले रेडियोले आवाजको सफल कलाकार गुमाएको अध्यक्ष सुमन गोपाल आचार्यले बताए।

पश्चिम नवलपरासीको भोजपुरी भाषा र पत्रकारिता करिब १७ वर्षसम्म गरेको योगदानको कदर गर्दै नेपाल पत्रकार महासंघको सदस्यता निम्ति सिफारिस पठाएको एक पत्रकार गुमाउनु पर्दा महासंघलाई नै ठूलो क्षति हुन पुगेको नेपाल पत्रकार महासंघ पश्चिम नवलपरासीका अध्यक्ष हरि शर्माले बताए। सोमबार भएको श्रेष्ठको निधनले एक कर्मठ ,सक्षम र लगनशील रेडियोकर्मी गुमाएको स्थानीयले बताएका छन्।