पर्रोहा बोलबम धाममा लाग्ने श्रावणी मेला स्थगित

बुटवल । ‘स्वयम् उत्पत्तिमान नेपालकै एकमात्र बोलबमधाम’ मानिने रुपन्देहीको सैनामैना स्थित पर्रोहा बोलबम धाममा लाग्ने यस वर्षको श्रावणी मेला तथा बोलबम जलार्पण कार्यक्रम स्थगित भएको छ । हरेक वर्ष गुरुपूर्णिमाका दिनदेखि जनैपूर्णिमासम्म एक महिना लाग्ने श्रावणी मेला ,बोलबम जलार्पण तथा यात्रा कार्यक्रम यो वर्ष स्थगित गरिएको छ । विश्वव्यापी कोरोना महामारीसँगै सरकारले आह्वान गरेको लकडाउनलाई मध्यनजर गरी सम्पूर्ण कार्यक्रम स्थगित गरिएको धाम व्यवस्थापन समितिका अध्यक्ष रामवली चौधरीले जानकारी गराए ।

२ दशक अघिदेखि सुरु भएको बोलबम जलार्पणका क्रममा विगतका वर्षहरुमा स्वदेशका सबै जिल्लाहरुबाट बाग्मती, त्रिवेणी, गण्डकी, रिडी, जलेश्वर, नारायणी लगायत विभिन्न नदी तथा घाटबाट जल ल्याई बोलबमधाममा अर्पण गर्न हजारौं संख्यामा श्रद्धालु भक्तजनहरु आउने गरेका थिए । ‘भिडभाडले कोरोनो संक्रमण थप फैलिन सक्ने भएको हुँदा सरकारले गरेको निर्णयलाई कार्यान्वयन गर्नका लागि यस वर्षका सम्पूर्ण धार्मिक कार्यक्रम स्थगित गरेका छौं ।’–चौधरीले भने ।

बुटवलबाट–११ किलोमिटर पश्चिम रानीबगिया र रानीबगियाबाट २ कि.मि.दक्षिणमा अवस्थित यो धाम धार्मिक आस्थाको केन्द्रबिन्दु हो । तिर्थयात्रा, जलार्पण लगायत कार्यक्रम तथा धाम परिसरमा विगत वर्षहरुमा जस्तो बजार पसल सञ्चालनमा रोक लगाइने अध्यक्ष चौधरीले बताए । पुजापाठका लागि आउने स्थानीयहरुलाई भने सामाजिक दूरी कायम राखी व्यवस्थापन गरिने उनले बताएका छन् ।

पश्चिमको पशुपति भनेर चिन्न सकिने यस धाममा विगत वर्षहरुमा साउनको एक महिना भव्य धार्मिक मेलाको आयोजना हुने गर्दथ्यो । धाममा पहेँलो तथा गेरु वस्त्र पहिरेर विभिन्न नदि, घाट तथा घरबाट पैदलयात्राद्वारा जल ल्याई जलार्पण गर्ने परम्परा रहेको छ । खाली खुट्टा बोलबम ! बोलबम !! बोलबम !! उच्चारण गर्दै जलार्पण गरे पाप क्षमा हुने र अनन्य पुण्य कमाइने जनविश्वास रहँदै आएको छ ।