गुल्मी पहिरो अपडेट : २ बालकको मृत्यु १ बेपत्ता, ५ घाइतेलाई काठमाण्डौं लगियो

गुल्मी । गुल्मीमा पहिरोका कारण २ जनाको मृत्यु भएको छ । अबिरल वर्षासँगै गुल्मीको इस्मा गाउँपालिकाको वडा नम्बर–१ को मल्दीम गएराति पानीसँगै पहिरोमा परेर १८ महिनाका सिजन सारु र ७ वर्षकी अपेक्षा खत्रीको मृत्यु भएको जिल्ला प्रहरी कार्यालय गुल्मीका प्रहरी उपरिक्षक राजेन्द्रसिंह खड्काले जानकारी दिए । पहिरोमा परेर ५ जना घाइते भएका छन् । घाइतेहुनेहरुमा ५ वर्षका आयुष खत्री, २९ वर्षकी इश्वरा खत्री, ६४ वर्षका टिका खत्री, २२ वर्षकी सृजना सारु, २५ वर्षका बसन्त सारु रहेको प्रहरीले जनाएको छ ।

घाइतेहरु सबैलाई थप उपचारको लागि काठमाडौं पठाइएको छ । पूर्वमन्त्री तथा संसद गोकर्ण बिष्ट पहिरो प्रभाबित क्षेत्रमै पुगेर स्थलगत अनुगमन गरेर थप उपचारको लागि काठमाडौं पठाइएको हो । घाइतेहरु ३ जनालाई पहिरो प्रभावित क्षेत्रबाटै र २ जनालाई उपचारको लागि तम्घास लगिएकोमा सोहि स्थानबाटै उपचारको लागि काठमाण्डौं पठाइएको प्रमुख जिल्ला अधिकारी भरतकुमार शर्माले जानकारी दिए । घर माथीबाट गएको पहिरोमा परिवारका अन्य सदस्य भाग्न सफल भएका थिए ।

त्यस्तै मुसिकोट नगरपालिका वडा नम्बर २ का भागीरथ घिमिरे पहिरोमा पुरिएर बेपत्ता भएका छन् ।
रातिबाट बेपत्ता घिमिरेको अवस्था अझै पत्ता नलागेको वडाध्यक्ष लक्ष्मण खत्रीले जानकारी दिए । पहिरोले गाउँ–गाउँबिचकै सम्पर्क बिच्छेद भएको र अन्य मुल सडक समेत अवरुद्ध भएका कारण उद्धारमा समस्या भएको छ । अहिले नेपाल प्रहरी, सशस्त्र प्रहरी र नेपाली सेनाको टोली घटना स्थलमा उद्धारको लागि घटना स्थलमा रहेको प्रमुख जिल्ला अधिकारी शर्माले जानकारी दिए ।