गुल्मी पहिरो अपडेट : २ जनाको मृत्यु, एक अझै वेपत्ता

बुटवल । गएराती देखि परेको अविरल वर्षाकाका कारण गुल्मीको इस्मा गाउँपालिकामा पहिरो जाँदा २ जनाले ज्यान गुमाएका छन् । इस्मा गाउँपालिका-१ (साविकको हस्तिचौर-१) मा पहिरोले पुरिएर इस्मा-१ हस्तिचौरका वसन्त सारुका १८ महिनाका छोरा सिजन र सोही ठाउँ निवासी रिखबहादुर खत्रीकी ७ वर्षीया छोरी अपेक्षाको ज्यान गएको जिल्ला प्रहरी कार्यालय गुल्मीले जनाएको छ । वर्षासँगै आएको पहिरोमा परि अन्य चार जना गम्भीर घाइते भएका छन् । पहिरोमा परी अझै एक जना वेपत्ता छन् ।

घटनास्थलमा नेपाल प्रहरी, नेपाली सेना तथा सशस्त्रको टोलीले उद्धार कार्य जारी राखेका छन् । मौसमका कारण फोन सम्पर्क हुन नसकेपछि घटना स्थलका बारेमा थप जानकारी आउन नसकेको गाउँपालिका अध्यक्ष विष्टले बताए । हस्तिचौर स्वास्थ्यचौकीका इन्चार्ज समसुलहक मियाँको टोली पुगेर घाइतेहरुको उद्धार गरेको छ ।

उद्धारका लागि हेलिकप्टर ल्याउने भनिएपनि मौसमको खराबीका कारण हेलिकोप्टर आउन नसकेको वडा नम्बर १ का अध्यक्ष चुराबहादुर खत्रीले बताए । पूर्वमन्त्री तथा गुल्मीका सांसद गोकर्ण विष्टले हेलिकोप्टर ल्याउने तयारी भएको बताएपनि अवतरण गर्न नसक्ने बताएपछि काठमाडौंमै रोकिएको उनले जानकारी गराए । त्यस्तै मुसिकोट नगरपालिका वडा नम्बर २ का भागीरथ घिमिरे पहिरोमा पुरिएर बेपत्ता भएका छन् । वर्षाका कारण मूलसडकसमेत अवरुद्ध भएका कारण उद्धारमा समस्या भएको छ ।

१ सय ३५ घर-परिवार विस्थापित हुने अवस्थामा
पहिरोका कारण इस्मा-१ मा साविक हस्तिचौर-१ का सय घर–परिवार विस्थापित हुने अवस्थामा रहेको वडा अध्यक्ष खत्रीले जानकारी गराएका छन् । यसैगरी इस्मा-१ का रातापानी, ढाड, थोरे डाँडा, भुम्ला पोखरालगायतका वासिन्दाहरु जोखिममा रेहेको गाउँपालिका अध्यक्ष विष्टले बताएका छन् । इस्मा-४ मा रहेको कालीका आधारभूत विद्यालयको २ वटा भवन भत्किएको छ । जहाँ क्वारेन्टिन स्थापना गरी ७ जना वस्दै आएका थिए । उनिहरुलाई अन्यत्र व्यवस्थापन गरिएको छ ।

वडा नम्बर ४ का ७ घर-परिवार विस्थापित भैसकेका छन् । यसअघिनै त्यस स्थानबाट १४ घरपरिवार विस्थापित भैसकेका छन् । जुेकपानीमा रहेका १५/२० घरपरिवार विस्थापित हुने अवस्थामा रहेका छन् भने मिल्दीका १५ घर-परिवार विस्थापित हुने अवस्थामा रहेका छन् ।