‘वित्तिय क्षेत्रमा हुने लगानीले आर्थिक क्रियाकलाप वृद्धि’

बुटवल । वित्तिय क्षेत्रमा हुने लगानीले आर्थिक क्रियाकलाप वृद्धि गर्ने प्रदेश ५ का मुख्यमन्त्री शंकर पोखरेलले बताएका छन् । बिहिवार मेगा बैंक नेपाल लिमिटेडको प्रादेशिक कार्यालय उद्घाटन समारोहमा बोल्दै पोखरेलले बैंकले लगानीकै आधारमा कस्तो सेवा प्रवाह गर्छ र सामर्थ वृद्धि गर्छ, त्यसका आधारमा भविष्यको सम्भावना राम्रो हुने बताए ।

गत वर्ष नेपालको कुल आर्थिक वृद्धिदर ७ दशमलब १ प्रतिशत रहदा प्रदेश ५ को ७ दशमलब ४ प्रतिशत रहनु नै देशैभरको आर्थिक वृद्धिदरमा उच्च रहेको बताए । ‘आर्थिक वृद्धिदरका हिसाबले सबैभन्दा बढी वृद्धिदर रहेको प्रदेश हाम्रो प्रदेश हो, यो प्राप्ती वित्तिय क्षेत्रबाट पनि सम्भव भएको हो’ उनले भने । जनसंख्याको ठुलो हिस्सा बैंकिङ क्षेत्रमा जोडिएको उनले बताए । बैंकिङ कृयाकलापबाट बाहिर रहेका नागरिकलाई कसरी आकर्षण गर्ने भन्ने कुरामा बैंकले वित्तिय साक्षरताको अभियान चलाउनुपर्ने उनले जनाए । यस्ता अभियानमा लगानी गर्न र सहभागि हुन प्रदेश सरकार तयार रहेको उनले बताए । कुनैपनि क्रियाकलाप अघि बढाउन आवश्यक पर्ने पुर्वाधार विकासका लागि प्रदेश सरकार अघि बढेको पोख्रेलले बताए । गौतम बुद्ध अन्तर्राष्ट्रिय विमानस्थल संचालनमा आएपछि पर्यटन, उद्योगको विकासमा तिब्रता आउने र यसर्लेै वित्तिय कारोबार बढाउने दाबी गरे । उनले प्रदेशका विभिन्न सडक निर्माण र स्तरोन्नतीबाट समेत आर्थिक कारोबार बढाउने बताए ।

बुटवलको मिलनचोकमा स्थापित प्रादेशिक कार्यालय मार्फत बैंकले बिहिवारबाट सेवा सुरु गरेको बैंकका अध्यक्ष भोजबहादुर शाहले बताए । यो पहिलो प्रादेशिक कार्यालय हो, उनले भने, ६३ जिल्लामा शाखा विस्तार भएको छ । वाणिज्यतर्फ छैठौं स्थानमा रहेको मेगा बैंकमा ३ हजार प्रोमोटर छन् । बैंकले देशभरि १ सय ११ शाखाबाट वित्तिय सेवा प्रदान गरिरहेको छ । वैशाखभित्रमा गण्डकी विकास बैंक मेगामै गाभिएपछि मेगाको पुंजी १ अर्ब भन्दा बढी पुग्ने शाहले बताए । गण्डकी आएपछि बैंकका शाखा २ सय ९ पुग्नेछन् ।