तिलोत्तमा देशकै पहिलो पोलिथिनमुक्त नगर

बुटवल । रुपन्देहीको तिलोत्तमा नगरपालिका नेपालमै पहिलो शुन्य पोलिथिन र पूर्ण सरसफाईयूक्त स्थानीय तहका रुपमा घोषणा हुने भएको छ । विगत ८ महिनादेखि नगरपालिका र सिम नेपालको सहकार्यमा नगर क्षेत्रको १ सय २६ वर्गकिलोमिटर भू–भागबाट १२ हजार क्विन्टल फोहर जन्य पोलिथिन संकलन गरि व्यवस्थित गरेपछि शुक्रबार नगरलाई शून्य पोलिथिन तथा पूर्ण सरसफाईयूक्त नगर घोषणा गरिने भएको हो । २ वर्ष देखि सरसफाईको क्षेत्रमा निरन्तर लागेर नगरपालिकालाई शून्य पोलिथिन र पूर्ण सरसफाइयूक्त स्थानीय तहका रुपमा घोषणा गर्न सक्ने अवस्थामा पुराएको नगर प्रमुख बासुदेव घिमिरेले बताए ।

नगरपालिकालाई यो अभियानमा सफल बनाउन १ सय ८९ वटा टोल संस्था, नगरका ८५ वटा सामुदायिक र संस्थागत विद्यालय, स्थानीय क्लब, सामाजिक संघ संस्था, जनप्रतिनिधी तथा सिम नेपालका कर्मचारी गरि १ लाख जनाको जन सहभागिताले काम गरेको नगरप्रमुख घिमिरेले जानकारी गराए । शून्य पोलिथिन तिलोत्तमा नगर घोषणा सभा बारे जानकारी गराउन विहिवार आयोजित पत्रकार सम्मेललनमा नगर प्रमुख घिमिरेले एक विशेष समारोहका बीच कृषि, पशुपन्छी तथा सहकारी मन्त्री घनश्याम भुसालले नगरलाई शून्य पोलिथिन र पूर्ण सरसफाईयूक्त स्थानीय तहका रुपमा घोषणा गर्ने कार्यक्रम रहेको बताए । घोषणासँगै नगर क्षेत्रमा अब खुल्ला रुपमा यत्रतत्र र छरफष्ट देखिने गरि पोलिथिन फ्याकिएको देख्न पाईने छैन ।

सभ्य नगरपालिकाको रुपमा स्थापित भएको संकेत पनि यो अयिानले दिएको छ । यो अभियानले कृषिको उत्पादनमा वृद्धि, डेंगु रोगको नियन्त्रणमा टेवा पुगेको र वातावरणिय हिसाबले पनि नगरलाई सरसफाईयूक्त नगर बनाउन महत्वपूर्ण टेवा पुगेको मेयर घिमिरेले बताए । नगरवासिमा पोलिथिनको प्रयोग गर्नु हुँदैन भन्ने आनीवानीमा परिवर्तन गर्न सक्नु नै राम्रो उपलब्धी भएको र यस्ता कार्यक्रमलाई मुलुक भरी लागु गर्नेतर्फ जोड दिनु पर्नेमा सिम नेपालका अभियान्ता निपेस अधिकारी ढाकाले बताए । चुनौतिपूर्ण अभियानमा सफल भएको र यसलाई नियमित अनुगमन गरि व्यवहारमा सदासदाका लागि कार्यान्वय गराउन नगरपालिकालाई जिम्मेवारी थपिएको समेत उनले बताए ।

जनश्रमदान र नगरपालिकाको लगानी गरि करोडौको लागतमा यो अभियान सफल बनाउन सकिएको नगरपालिकाका प्रवक्ता सुरेन्द्र श्रींले बताए । नगरपालिकाले नगरमा संकलन हुने फोहरजन्य पदार्थलाई नगरभित्रै संचालित वास सहकारी मार्फत व्यवस्थापनको जिम्मेवारी प्रदान गरेको छ । यद्यपी नगरपालिकाले यसको अनुगमन भने नियमित रुपमा आफैले गर्ने जनाएको छ ।