टिपरको ठक्करबाट बाँकेमा महिलाको मृत्यु, पिपरी तनाव ग्रस्त

बाँके। नेपालगन्ज-कोहलपुर सडकखण्डको पिपरीमा टिपरको ठक्करबाट एक महिलाको ज्यान गएको छ । नेपालगन्जदेखि कोहलपुरतर्फ जाँदै गरेको रा१ख २१८८ नम्बरको टिपरले ठक्कर दिँदा कोहलपुर ९ झण्डहवाका रामपति थारुको मृत्यु भएको हो ।

कोहलपुर नगरपालिका ९ की ४५ वर्षीया रामपति थारुको घटनास्थलमै मृत्यु भएको बाँके प्रहरीले जनाएको छ । तीव्र गतिमा गुडिरहेको टिपरले सडकमा मजदुरी गर्न हिँडिरहेकी थारुलाई बिहान साढे १० बजेतिर ठक्कर दिएको थियो । टिपरको ठक्करबाट थारुको मृत्युभएपछि पिपिरी क्षेत्रमा स्थानीयले सडक अवरोध गरेका छन्। स्थानीयहरुले अहिले चक्काजाम गर्दै यातायात अवरुद्ध गरेका हुन्। स्थानीयहरुले टिपर चालकलाई कारबाहीको माग गर्दै मृतकका आफन्तलाई उचित क्षतिपूर्ति दिन माग समेत गरेका छन् ।

इलाका प्रहरी कार्यालय कोहलपुरका प्रहरी नायव उपरीक्षक कुलदिप चन्दका अनुसार नेपालगन्जबाट कोहलपुरतर्फ जाँदै गर्दा थारुलाई टिपरले ठक्कर दिएको थियो। ठक्कर दिने टिपर र चालकलाई इलाका प्रहरी कार्यालय कोहलपुरले नियन्त्रणमा लिएको छ। – भिम पौडेलको सहयोगमा