कच्चा तेलको मूल्यमा भारी गिरावट, बजारमा ३० वर्षपछिकै ठूलो नोक्सानी

काठमाडौँ । विश्वबजारमा तेलको मूल्यमा २५ प्रतिशतले गिरावट आएको छ । सोमबार तेलको भाउ २५ प्रतिशतले घटेको रोइटर्स समाचार माध्यमले जनाएको छ । साउदी अरबले मूल्य घटाउने र अप्रिलमा कच्चा तेल उत्पादनको मात्रा बढाउने निर्णय गरेसँगै विश्वबजारमा गिरावट आएको हो । योसँगै विश्व तेल बजारमा सन् १९९१ पछि कै सबैभन्दा ठूलो नोक्सानी हुने देखिएको छ ।

तेल उत्पादन मुलुकहरूको समूह ओपेकले कोरोना भाइरसबाट उत्पन्न चिन्ताबीच बजारलाई स्थिर बनाउन भन्दै उत्पादनमा कटौती गर्ने प्रस्ताव अघि सारेको थियो । तर ओपेकले अघि सारेको प्रस्तावप्रति रुस अनिच्छुक देखिएपछि साउदी अरबले मूल्य घटाउने निर्णय गरेको हो । सोमबार ब्रेन्ट नामक कच्चा तेलको मूल्य प्रति ब्यारेल ११.३१ अमेरिकी डलरले घटेको छ । उक्त गिरावटसँगै विश्वबजारमा सन् २०१६ पछिकै कम मूल्यमा कच्चा तेलको कारोबार भइरहेको छ । समाचार अनुसार हाल ब्रेन्ट कच्चा तेलको कारोबार प्रति ब्यारेल ३३.९६ अमेरिकी डलरमा भइरहेको छ । सन् १९९१ मा खाडी युद्ध सुरु हुने बेलामा विश्व तेल बजारले यस्तै नोक्सानी व्यहोरेको थियो ।

त्यस्तै वेस्ट टेक्सास इन्टरमिडियड (डब्लुटिआई) नामक कच्चा तेलको मूल्य २६ प्रतिशतले घटेर प्रति ब्यारेल ३०.५५ अमेरिकी डलर पुगेको छ । उक्त गिरावट पनि सन् १९९१ पछिकै सबैभन्दा बढी हो ।भाइरसको जोखिममाझ तेलको मूल्य स्थिर गर्नेबारे ओपेक र रुसबीच सहमति हुन नसकेपछि कच्चा तेलको मूल्यमा भारी मात्रामा गिरावट आएको हो । योसँगै रुस र साउदी अरबबीच कच्चा तेलको मूल्यलाई लिएर मतभेद देखिन सक्ने कतिपयले अनुमान गर्न थालेका छ्न् । साउदी अरबले अप्रिलसम्ममा उत्पादन बढाएर प्रतिदिन १० मिलियन ब्यारेलभन्दा बढी तेल उत्पादन गर्ने योजना बनाइरहेको छ ।

साउदी अरब विश्वमै सबैभन्दा बढी तेल निर्यात गर्ने मुलुक हो । साउदी अरबले विश्वमै सबैभन्दा बढी तेल उत्पादन गर्ने दोस्रो मुलुक रुसलाई दण्डित गर्नका लागि पछिल्लो कदम चालेको समाचारमा उल्लखे गरिएको छ । उत्पादन कटौती गर्ने ओपेकको प्रस्तावलाई रुसले समर्थन नगरेपछि साउदीले मूल्य घटाएको समाचारमा बताइएको छ ।