फर्साटिकरमा शुक्रबारदेखि खुल्ला भलिबल

बुटवल । युवाहरुलाई लक्षित गरी रुपन्देहीको शुद्वोधन गाउँपालिका फर्साटिकरमा खुल्ला भलिबल प्रतियोगिता शुक्रबार देखि सुरु हुँदै छ । फर्साटिकर वडा नम्बर ४ स्थित फर्साटिकर उच्च माध्यामिक विद्यालयको प्राङ्णमा हुने प्रतियोगिताका लागि एमएल पोखरेली ढुङ्गा सप्लायर्सले सहयोग तथा व्यवस्थापन गर्दै आएको छ । दोस्रो संस्करणका रुपमा आयोजना गरिएको प्रतियोगितामा १८ टिमले प्रतिस्पर्धा गर्दै छन् । एमएल पोखरेली ढुङा सप्लायर्स एण्ड बेतबांस फर्निचरका प्रोप्राइटर मिलन निउरेले राष्ट्रिय खेल भलिबललाई स्थापित गराउने उद्देश्यले प्रतियोगिता सम्पन्न गर्नका लागि आर्थिक र भौतिक सहयोग गरेको जानकारी गराए ।

सप्लायर्सले सामाजिक उत्तरदायित्व बहन गरि खेलकुदको बिकास र प्रवद्र्धनका लागि प्रतियोगिता सञ्चालन गर्दै आएको र यसलाई निरन्तरता दिने उनले बताए । प्रतियोगितामा प्रथम हुनेलाई ३३ हजार रुपैंया, द्वितीय हुनेलाई २२ हजार रुपैंयाँ र तृतीय हुने टिमलाई ११ हजार रुपैंया नगद पुरस्कारसहित कप, मेडल र प्रमाणपत्र प्रदान गरिने प्रतियोगिताका संयोजक मेखबहादुर क्षेत्रीले जानकारी गराए । प्रतियोगितामा विधागत उत्कृष्ट हुने खेलाडीलाइसमेत पुरस्कृत गरिने छ । ग्रामिण क्षेत्रमा रहेको सुद्धोधन गाउँपालिकालाई भलिबल खेलको माध्यमबाट राष्ट्रिय रुपमा परिचित गराउन र युवाहरुलाई कुलतमा लाग्न रोक्नका लागि प्रतियोगिता आयोजना गरिएको प्रतियोगिताका सल्लाहकार नरेन्द्र बिक्रम खड्काले बताए ।

प्रतियोगिता सञ्चालन गर्न ३ लाख १६ हजार बढी रकम लाग्ने अनुमान गरिएको छ । प्रतियोगिताको प्रमथ पुरस्कार अमेरिकामा रहेका फर्साटिकर निवासी बिवेक जीसीले प्रायोजन गरेको प्रतियोगिताका सदस्य मनोज भण्डारीले जानकारी गराए । प्रतियोगिता सञ्चालनमा भएको आम्दानीको २५ प्रतिशत रकम सामाजिक क्षेत्रमा खर्च गरिने सप्लायर्सका अध्यक्ष निउरेले जानकारी गराए ।