एसियन च्यालेन्जर ट्रफी क्रिकेटको उपाधि शंकरनगरलाई

फागुन २२,

भैरहवा । भैरहवामा सञ्चालित अन्तरदेशीय एसियन च्यालेन्जर ट्रफी (क्लब) क्रिकेट प्रतियोगिताको उपाधि शंकरनगर क्रिकेट क्लब रुपन्देहीले जितेको छ । बिहीबार भएको फाइनल खेलमा राइनोज क्रिकेट क्लब काठमाण्डौंलाई २६ रनले पराजित गर्दै शंकरनगरले प्रतियोगिताको उपाधि पाउन सफल पाएको छ ।

टस जितेर राइनोजले फिल्डिङ रोजेपछि पहिला व्याटिङको गरेको शंकरनगरले निर्धारित २० ओभरमा ६ विकेट गुमाउँदै १७७ रनको योगफल बनाएको थियो । उसका लागि शंकर रानाले ७६, तुल बहादुर थापाले २५, सन्दिप सुनारले २२ र सुरज दराईले नटआउट १९ रनको योगदान गरे । बलिङमा राइनोजका सुर्य तामाङले २ तथा कमल सिंह ऐरी, रोहित कुमार पौडेल र रमेश कुर्मीले १/१ विकेट लिए । १ सय ७८ रनको विजय लक्ष्यका साथ व्याटिङ्ग गरेको राइनोज १९ दशमलव ५ ओभरमा १० विकेट गुमाउँदै १५१ रन समेटिएको थियो । रोहित कुमार पौडेलले ७५, धिरज शाहीले २१, गजेन्द्र बोहराले १७ र प्रकाश के.सी.ले १५ रनको योगदान गरे । बलिङमा शंकरनगरका अनिल खरेलले ३ तथा दुर्गेश गुप्ता, सन्दिप सुनार, साहब आलम र विक्रम भुसालले १/१ विकेट लिए । खेलमा शंकरनगरका शंकर राना म्यान अफ द म्याच घोषित भए ।

प्रतियोगितामा असरक ग्लोबल स्पोर्टस् बंगलादेशका अलि समद म्यान अफ द सिरिज तथा बेष्ट ब्याट्सम्यान, शंकरनगर क्रिकेट क्लब रुपन्देहीका विक्रम भुसाल वेष्ट बलर र शंकरनगरकै सौरभ खनाल मोष्ट भ्यालुएबल प्लेअर घोषित भएको रुपन्देही क्रिकेट संघका अध्यक्ष प्रशान्त विक्रम मल्लले बताए । भैरहवा क्वीन्स प्रा.लि.को आयोजना, राइनो स्पोर्ट्सको संयोजन तथा रुपन्देही क्रिकेट संघको प्राविधिक सहयोगमा भैरहवास्थित सिद्धार्थ रंगशालामा सञ्चालित अन्तरदेशीय टी–ट्वान्टी प्रतियोगितामा नेपालसहित भारत, बंगलादेश पाकिस्तानका गरी ८ वटा व्यवसायिक क्लबले प्रतिष्पर्धा गरेका थिए । प्रतियोगिताको ह्वाक नेपाल, कामना सेवा बैंक, स्प्यारो एसएमएसले प्रायोजन गरेको थियो । प्रतियोगिताको विजेताले ३ लाख नगद पुरस्कार पाएका छन् ।

प्रतियोगिताका विजेतालाई प्रदेश नम्बर ५ का प्रदेशसभा सदस्य सन्तोष कुमार पाण्डेयले पुरस्कार प्रदान गरे । सो अवसरमा बोल्दै प्रदेशसभा सदस्य पाण्डेयले खेलकुद क्षेत्रको विकासको लागि राज्यले ध्यान दिनुपर्ने बताए ।