ग्लोबल आवाजAdvertisement
बुटवल । नेपाल चलचित्र बोर्डले बुटवलको क्यूएफएक्ससहितका हलहरुको सोमबार निरीक्षण गरेको छ । बोर्डका सदस्य तथा प्रवक्ता केएल बुढाथोकीको नेतृत्वमा बटवलका हलहरुको निरीक्षण तथा मोफसलमा व्यापारको अवस्था बारे अन्तरक्रिया गरिएको हो ।
विश्वव्यापी कोरोना महामारी तथा आर्थिक मन्दीसँगै देशभरका सिनेमा हलहरु मर्कामा परेको बताउँदै चलचित्र बोर्ड प्रवक्ता बुढाथोकीले फेरि पहिलेकै अवस्थामा ल्याउने गरि बोर्ड लागिरहेको बताए । विशेष गरि मोफसलमा हलहरुमा दर्शक ल्याउने गरि आफ्नो पहल सधै जारी रहने उनले प्रतिवद्धता गरे । चलचित्र पत्रकार संघ रुपन्देहीका पूर्व अध्यक्ष सुमन श्रेष्ठले विगतदेखिनै मोफसललाई केन्द्रले हेर्ने दृष्टिकोणमा परिवर्तन ल्याउनु पर्नेमा जोड दिए । श्रेष्ठले बुटवल लगायत काठमाडौं बाहिरका शहरहरुमा पनि सुविधा सम्पन्न र स्तरीय फिल्महलहरु थपिने क्रम बढेको बताउँदै चलचित्रको व्यापार विस्तारका लागि दृष्टिकोण परिवर्तन गर्न आवश्यक रहेकोमा जोड दिए ।
चलचित्र पत्रकार संघ रुपन्देहीका अध्यक्ष मोहन न्यौपानेले मोफसलमा रहेर काम गरिरहेका पत्रकार तथा रङ्गकर्मीका लागि राज्यले आवश्यक लगानी गर्न नसकेको गुनासो गरे । संघका उपाध्यक्ष दिनेश कुमार श्रेष्ठले मोफिलमा रहेर कलम चलाउने पत्रकारहरुको क्षमता विकासका लागि चलचित्र बिकास बोर्ड लगानी गर्न आग्रह गरे । निरीक्षणका क्रममा बुटवल क्यूएफएक्सका व्यवस्थापक महेश्वर गिरी, भ्यूसिनेमा बुटवलका सञचालक प्रेमप्रकाश श्रेष्ठ, तथा क्यूबक्स बुटवलका सञ्चालक महेन्द्र नारायण श्रेष्ठले आफ्ना समस्याहरु बारे बोर्डलाई जानकारी गराएका थिए ।
प्रतिकृया दिनुहोस्