बुटवलमा ईस्लाम धर्मालम्विहरुको धर्मगुरु पैगम्बरको १४९८ औं जन्मोत्सव विविध कार्यक्रम गरि मनाइँदै

बुटवल । ईस्लाम धर्मालम्विहरुको धर्मगुरु पैगम्बर हजरत मुहम्मद मुस्तफा स्वल्लल्लाहो अलैहेव वसल्लमको १४९८ औं जन्मोत्सवको अवसरमा बुटवलमा विभिन्न कार्यक्रम हुने भएका छन् । रजा-ए-मुस्तफा जामे मस्जिद समिति बुटवल-१ ले बुटवलमा विभिन्न कार्यक्रम गरि पैगम्बरको जन्मोत्सव मनाउने भएको हो ।

समितिले असोज ८ गते सोमबार ईस्लामिक विद्यार्थीका बीचमा अन्तर विद्यालय हाजिरीजवाफ प्रतियोगिता, १० गते बुधबार अनाथ तथा असहायलाई खाद्यान्न वितरण, बुधबार साँझ मिलादुननवी कार्यक्रम र असोज ११ गते विहान बुटवलमा ईस्लामिक समुदायको शान्ति र्याली आयोजना गरेको अध्यक्ष मुहम्मद ईस्माइलले जानकारी दिए । आइतबार समितिले पत्रकार सम्मेलन गरेर पैगम्बरको जन्मोत्सव भब्य रुपमा सम्पन्न गर्नका लागि सम्पूर्ण तयारी पूरा भएको ईस्माइलले बताए । इस्लाम समुदायिका ब्यक्ति ब्यक्ति बीचमा आपसि भाईचारा विस्तार एवं धर्म संरक्षणका लागि पनि पैगम्बरको जन्मोत्सव महत्वपूर्ण भएकाले कार्यक्रममा सहभागिताका लागि सम्पूर्ण इस्लाम धर्मका अनुयायीहरुलाई अनुरोध गरिएको समितिका बरिष्ट उपाध्यक्ष हाजि अब्दुल सहमतले जानकारी दिए ।

पैगम्बरको जन्मोत्सवमा प्रत्यक वर्ष कार्यक्रम आयोजना गर्दै आएको र यसवर्ष पनि सोको निरन्तरताका लागि बुटवलमा विभिन्न खाले सप्ताहब्यापी रचनात्मक कार्यक्रम आयोजना गरिएको उपमहासचिव हसरदिन मियाले बताए । बुटवल क्षेत्रका झण्डै ५ हजार मुस्लिम समुदायका ब्यक्तिहरु आवद्ध रहेको रजा–ए–मुस्तफा जामे मस्जिद समिति बुटवलले धर्म गुरु पैगम्बरको जन्मोत्सवमा असोज ७ गतेदेखि ११ गतेसम्म विभिन्न कार्यक्रमको आयोजना गरेको सचिव जनूर दिन वारसीले बताए ।