काठमाडौँ । नेकपा एमालेका सांसद सूर्यबहादुर थापाले प्रतिनिधि सभाको बैठकमा सरकारका प्रधानमन्त्री, मन्त्री सहभागी नभएको भन्दै सभामुख देवराज घिमिरेको ध्यानाकर्षण गराएका छन् ।

बिहीबार बसेको प्रतिनिधि सभाको बैठकको शून्य समयमा सभामुखको ध्यानाकर्षण गराउँदै थापाले संसदमा मन्त्रीको उपस्थिति नहुनु घनघोर अपमान भएको टिप्पणी गरेका छन् ।

प्रतिनिधि सभाको शुन्य समय चलिरहेको थियो। शुन्य समयमा नेकपा (एमाले) बाट निर्वाचित सांसद् सूर्य थापाले बीचैमा उठेर विरोध गरे ।

सभामुख देवराज घिमिरेले किन उठ्नु भएको ? भनेर प्रश्न गरेपछि उनले सरकार हराएको भन्दै खोजी गरिपाउ भनि आग्रह गरे। त्यत्तिबेलासम्म सदनमा प्रधानमन्त्रीसहित २५ जनाको मन्त्रिपरिषद् रहेकोमा कोही पनि सहभागी थिएनन्। सरकारका कुनै पनि मन्त्री उपस्थित नरहेको सदन चल्न नसक्ने थापाले बताए। उनले सरकारले सदनको घोर अपमान गरेको आरोप लगाए ।

उनले भने, ‘सरकार हरायो सभामुख महोदय, सरकार खोजीपाँउ । मन्त्रीहरू बेगर यो सदनको कारबाही अगाडि बढ्न सक्दैन। प्रतिनिधि सभा नियमावली अन्तर्गत म सभामुख महोदयको गम्भीर ध्यानाकर्षण गराउन चाहन्छु, प्रधानमन्त्री र २५ जना मन्त्रीहरू मध्ये १ जना पनि यो सदनमा नदेखिनु यो घनघोर अन्याय हो, अपमान हो यो सदनको म गम्भीरतापूर्वक ध्यानाकर्षण गराउन चाहन्छु ।’

सांसद थापाले ध्यानाकर्षण गराउँदा गराउँदै राज्यमन्त्री नन्दा चपाई सभाहलमा प्रवेश गरेकी थिइन। सभामुख घिमिरेले मन्त्री बैठकमा आइसकेकोले अब बैठक नियमित अगाडि बढ्ने जानकारी गराए ।