सुशासन नहुँदा पूँजीपति समेत समस्यामा छन् : नेता महरा

गुल्मी । नेकपा माओवादी केन्द्रका स्थायी कमिटी सदस्य तथा लुम्बिनी प्रदेशका प्रमुख सचेतक जोखबहादुर महराले देशमा सुशासन नहुँदा ठूला पूँजी र लगानी समेत असुरक्षित भएको बताएका छन् । अहिलेको सरकार सुशासन कायम गर्न दत्तचित्त रहेको बताउँदै उनले निम्न वर्ग मात्र नभई पूँजीपतिहरु पनि समस्यामा रहेको उल्लेख गरे ।

मंगलबार गुल्मीको सदरमुकाम तम्घासमा आयोजित नेकपा माओवादी केन्द्र गुल्मी जिल्ला समन्वय समितिको पहिलो बैठकलाई सम्बोधन गर्दै उनले भने ‘देशमा सुशासन नहुँदा निम्न वर्ग मात्र हरेक समस्याको चपेटामा परेका छैनन्, ठूला पूँजीपतिहरुको लगानी असुरक्षित भए ।’ पार्टी अध्यक्ष प्रधानमन्त्री पुष्पकमल दाहाल प्रचण्डले सुशासन कायम गर्न आम जनताको साथ लिने गरी तीन महिने अभियान छेडेको बताए । अहिलेसम्मा रहेको सरकारी सिस्टमलाई बदल्नु पर्नेमा जोड दिए ।

उनले पार्टिको तीन महिने अभियानमा आफूले जितेका पालिकामा मात्रै नभई अन्य पालिका र घरमा पुगेर जनताको समस्या बुझेर समाधान गर्ने बताए । यहि भदौ १६ गते देखि ‘घरघरमा माओवादी, जनजनमा माओवादी’ भन्ने मूल नाराका साथ माओवादी केन्द्रले देशैभरि एकैपटक ‘जनतासँग माओवादी विशेष रुपान्तरण अभियान’ सुरु गर्दैछ । सोही अभियानको पूर्व सन्ध्यामा सो पार्टीको जिल्ला समन्वय समितिको बैठक आयोजना गरिएको र नेता महरा सहित केन्द्रीय सदस्यहरु कमल चुँदाली, भविश्वर तिवारी, गुल्मी जिल्लाका पूर्व इन्चार्ज जीतजंग उपनामले परिचित निमाकान्त डाँगी, र प्रदेश कमिटि सहसचिव पार्वती विक तीन महिने अभियानका लागि गुल्मी जिल्लामा खटिएका छन ।