तिनाउमा विद्यालय व्यवस्थापन तथा अभिभावक संघका पदाधिकारीलाई अभिमूखिकरण

बुटवल । पाल्पाको तिनाउ गाउँपालिकामा मुख्यमन्त्री शैक्षिक सुधार कार्यक्रम अन्तरगत शुक्रबार व्यवस्थापन समिति तथा अभिभावक संघका पदाधिकारीहरुलागि क्षमता विकास अभिवृद्धि कार्यक्रम आयोजना गरिएको छ । पालिका अन्तरगत रहेका विद्यालयहरुको व्यवस्थापन समितिका अध्यक्ष तथा अभिभावक संघका पदाधिकारीहरुलाई शैक्षिक सुधार बारे अभिमुखिकरण गरिएको थियो ।

सो कार्यक्रममा बोल्दै तिनाउ गाउँपालिका अध्यक्ष प्रेम श्रेष्ठले शैक्षिक सुधारमा थप जिम्मेवार भएर लाग्न आग्रह गरे । शिक्षक, अभिभावक र विद्यार्थी तीन पक्षले नै शैक्षिक सुधारमा जोड दिनु पर्ने बताउँदै उनले त्योभन्दा बढी व्यवस्थापनको क्षेत्रमा गम्भिर बन्नु पर्ने उल्लेख गरे । यसैगरी समय समयमा सहजिकरण र खबरदारीका लागि अभिभावक संघले जिम्मेवारी निभाउन उनले आग्रह गरे । गाउँपालिका उपाध्यक्ष लाबहादुर थापाले तिनाउलाई शैक्षिक उचाईमा पुर्याउन सबै एक भएर लाग्नुपर्नेमा जोड दिए । कार्यक्रममा तिनाउका शिक्षा समिति सदस्य राजेश श्रेष्ठ, दल बहादुर गुरुङ, शिक्षा शाखा प्रमुख लक्ष्मी कुँवर र कृष्ण ज्ञवालीले सहजिकरण गरेका थिए ।

यसैबीच तिनाउमा शैक्षिक सुधारलाई थप प्रभावकारी बनाउन विद्यालय व्यवस्थापन समिति महासंघको गठन गरिएको छ । तिनाउ–३ झुम्सामा अवस्थित तिलोत्तमा माविका अध्यक्ष टंकनाथ बस्यालको संयोजकत्वमा थानी डाँडा माविका अध्यक्ष शेरबहादुर थापा सहसंयोजक, युवा वर्ष माविका रोमबहादुर लम्तरी सचिव रहनेगरी महासंघ गठन गरिएको हो । यसैगरी सदस्यहरुमा जनदीप माविका गोपाल जिसी, आदर्श आधारभूत विद्यालयका यमबहादुर चिदी, सत्यवधि आविका ओमप्रकाश गाहा र जन आविका विनिता उचै रहेका छन् ।

यसैगरी शिक्षक अभिभावक संघको पनि महासंघ गठन गरिएको छ । उक्त महासंघको संयोजकमा दोभान माविका चक्रब्युह थापा र सह संयोजकमा मस्याम माविका एकुमाया रुचाल रहेका छन् । सचिवमा सिद्ध आविका किम बहादुर लाम्टाङ्गे तथा सदस्यहरुमा धन बहादुर गाहा, बिम कुमारी दर्लामी, यम बहादुर राना र टोप बहादुर बिक रहेका छन् ।