परासी । भैरहवा परासी सडक खण्ड अनतर्गत आज बिहान पश्चिम नवलपरासीको मन्जरीयामा भएको सवारी दुर्घटनामा एक जनाको मृत्यु भएको छ भने दुई जना गम्भिर घाईते भएका छन् । रामग्राम १० मा मन्जरीया चोक नजिकै आज बिहान चार बजेतिर लु १ च ६७९९ नम्बरको बोलेरोले भैरहवा तर्फ जादै गरेको लु ७० प ४०५४ नम्बरको मोटरसाइकललाई ठक्कर दिएको थियो ।

दुर्घटनामा परी मोटरसाईकलमा सवार रामग्राम १६ हकुईका ३३ वर्षिय केशव प्रसाद यादवको मृत्यु भएको हो । यादवलाई उपचारको लागी पृथ्वीचन्द्र अस्पताल परासी ल्याएपनि चिकित्सकले मृत घोषणा गरेका थिए । दुर्घटनामा परी मोटरसाईकलमै सवार दुई जना गम्भिर घाईते भएको जिल्ला प्रहरी कार्यालयका सुचना अधिकारी डिएसपि भोजराज पाण्डेयले जानकारी दिए ।

दुर्घटनामा परी गम्भिर घाईते ३० वर्षिय ईन्दल चौधरीको भैरहवा मेडिकल कलेजमा उपचार भैरहेको छ । घाईते हकुईकै नेम नारायण चौधरीलाई मुटुमा समस्या देखिएपछि थप उपचारका लागि काठमाण्डौँ रिफर गरिएको प्रहरीले जनाएको छ । ठक्कर दिएर फरार भएको पिकअप र चालकलाई प्रहरीले १० घण्टा पछि नियन्त्रणमा लिएको छ । सिसिटिभिको माध्यमबाट अनुसन्धान गरी चालकलाई प्रहरीले आज दिउसो सुनवल १२ भुमहिबाट नियन्त्रणमा लिएको हो ।