ताजा अपडेट »

सुरक्षित, अनुशासित र मर्यादित रुपमा गन्तव्यमा पुराउने ४० सवारी चालकलाई बुटवलमा सम्मान

सोमबार, १३ चैत्र २०७९, १९ : २९
28 Shares

बुटवल । सुरक्षित यात्रा नेपालले सवारी चालकहरूलाई सम्मान गरेको छ । लामो समयदेखि सवारी चालक पेशामा आवद्ध रही कुनैपनि मानवीय र भौतिक क्षति नगरि सुरक्षित, अनुशासित र मर्यादित रुपमा गन्तव्यसम्म पुराउने बुटवल उपमहानगरपालिका क्षेत्रबाट चल्ने, छुट्ने साना ठुला यात्रुवाहक एवम् मालवाहक सवारी साधनका ४० जना चालकहरुलाई सोमबार बुटवलको बसपार्कमा एक कार्यक्रमको आयोजना गरि सम्मान गरिएको हो ।

सम्मान कार्यक्रममा बोल्दै बुटवल उपमहानगरपालिका प्रमुख खेलराज पाण्डेयले आफू कुनै बेलामा यातायातको क्षेत्रमा आवद्ध भएर काम गरेको र सुरक्षित, अनुशासित र मर्यादित यात्रामा पुयाउने सवारी चालक सम्मानित हुँदा खुशी लागेको बताए । सार्वजनिक सवारीको संख्या पछिल्लो समय बढे पनि सवारी चालकको बोली र व्यवहारका कारण नराम्रो नजरले हेर्ने गरीकाले भाषागत शिष्टतामा ख्याल गर्नु पर्ने बताए ।

रुपन्देहीका प्रमुख जिल्ला अधिकारी भरतमणी पाण्डेले सवारी चालक पेशालाई सम्मानित गराउने पर्ने बताए । सडक दुर्घटनाका कारण मध्य प्रमुख कारण सडक, सवारीको कन्डिशन र चालक रहेको र चालक अनुशासित भए दुर्घटनालाई रोक्न सकिने बताए । साथै दुर्घटना न्यूनीकरणका लागि सार्वजनिक र निजी सवारी साधनको लागि छुट्टाछुट्टै लाइसेन्सको व्यवस्था गरि सडक दुर्घटना न्यूनीकरण गर्न सकिने बताए ।

पश्चिमाञ्चल बस व्यवसायी सँघका अध्यक्ष अध्यक्ष नारायण घिमिरेले सवारी पेशालाई राज्यले उपेक्षा गरेको गुनासो गरे । विमान दुर्घटना हुदा आयोग गठन हुने तर सडक दुर्घटना हुँदा राज्यले कुनै छानबिन समेत नगर्ने गरेको बताए । राज्य दुर्घटनाको कारण पत्ता लगाउन पनि सडक दुर्घटनाको सत्य तथ्य पत्ता लगाउन छानबिन समिति गठन गर्नु पर्ने बताए ।

राजमार्ग सुरक्षा तथा सडक सुरक्षा बुटवलका प्रमुख कृष्ण प्रसाईले सवारी दुर्घटनाको सबै दोष सधैं चालकलाई मात्रै दोश लगाउन नहुने बताए । सडक दुर्घटना तिब्र गति, मापसे र ओभर लोडका कारण धेरै हुने गरेकाले सावधानी अपनाएर सवारी चलाए दुर्घटना कम हुने बताए । सुरक्षित यात्रा नेपालका अध्यक्ष कृष्ण प्रसाद बेल्बासेले सवारी चालकहरुको मनोबल उच्च राख्नका लागि लामो समयदेखि सवारी चालक पेशामा आवद्ध रही कुनैपनि मानवीय र भौतिक क्षति नगरि सुरक्षित, अनुशासित र मर्यादित यात्रामा पुर्याउने सवारी चालकलाई सम्मान गरिएको बताए ।

कार्यक्रममा बुटवल उपमहानगरपालिका प्रमुख प्रशासकीय अधिकृत टेकराज पाण्डे, सुरक्षित यात्रा नेपालका सँरक्षक अर्जुन राना भाट, सडक डिभिजन कार्यालय बुटवलका प्रमुख होमबहादुर केसी र अधिवक्ता महेन्द्र पाण्डे र कार्यक्रम संयाेजक दिपक ढकालले सम्मानित हुने सवारी चालकको प्रशंसा गर्दै यो सम्मानले सबै सवारी चालकहरु मनोबललाई उच्च राख्न टेवा पुग्ने बताए ।

ग्लोबल आवाज
लेखकको बारेमा
ग्लोबल आवाज
ग्लोबल आवाज लुम्बिनी प्रदेशबाट प्रकाशित लोकप्रिय अनलाइन पत्रिका हो ।