मुलुक टाट पल्टिने बाटोमा लागेको छ, पुगिसकेको छैन : काँग्रेस नेता केसी

बुटवल । नेपाली कांग्रेसका नेता अर्जुन नरसिंह केसीले मुलुकको कहाली लाग्दो अवस्थाबाट बच्नका लागि सबै दल एक ठाउँमा उभिएर राष्ट्रिय सहमतीको खोजी गर्न आवश्यक रहेको बताएका छन् । मुलुकको आर्थिक अवस्था कहाली लाग्दो गतिमा ओराली लागेको बताउँदै उनले त्यसबाट बच्नका लागि सबैले सोच्न आवश्यक रहेको उल्लेख गरे ।

प्रेस युनियन रुपन्देहीले शनिबार बुटवलमा आयोजना गरेको पत्रकार सम्मेलनमा बोल्दै नेता केसीले श्रीलङ्का र पाकिस्तान हुँदै नेपालमा पनि आर्थिक संकटको अवस्था आउन लागेकोप्रति सचेत गराए । आर्थिक रुपमा मुलुक टाट पल्टिने बाटोमा रहे पनि त्यो अवस्थामा पुगिनगसकेको बताउँदै उनले पुनः लयमा ल्याउनका लागि सचेत गराए ।

यसैगरी फरक प्रशङ्गमा नेता केसीले संविधान भित्रका केही ब्यवस्था परिवर्तन गर्नुपर्ने अवस्था आएको बताएका छन्। अहिलेको विकृती र जनगुनासोलाई हेर्दा संविधानमा देखिएका केही व्यवस्था फेर्नु पर्ने अवस्था आएको उनले उल्लेख गरे । संविधानमा जहा जहा कमि कमजोरी देखिन्छन् त्यसलाई सुधार गर्दै जानुपर्ने बताए ।

‘सर्वसाधारणका गुनासा अगाडि जसरी आएका छन् त्यसका आधारमा मोडल चेन्ज गर्नु पर्छ। हामीले नै बनाएको संविधान हो त्यसप्रति गुनासा आउन थाले भने हामीले नै त्यसका विषयमा सोच्नु पर्छ।’– केसीले भने। ‘प्रदेश र स्थानीय सरकार संघीय सरकार संघको समन्वयका आधारमा चल्ने विधी हो तर त्यसमा कमजोरी देखिएको छ। यसका कारण पनि संघीयता प्रति गुनासो आएको हो भन्ने लाग्छ ।’ उनले भने।