रुपन्देहीको कञ्चनमा धार्मिक ज्ञान महायज्ञ हुने

बुटवल । रुपन्देही कञ्चन गाउपालिका वडा नं. १ मा १८ महापुराण पाठ पारण प्रवचन तथा धार्मिक ज्ञान महायज्ञ हुने भएको छ । महायज्ञको तयारी अन्तिम चरणमा पुगेको आयोजकले शनिबार पत्रकार सम्मेलन गरी जानाकारी दिएको छ । धर्ती माताको रुपमा परिचित बिष्णु कुंवरको नेतृत्वमा हुन लागेको महायज्ञमा प्रमुख कथा बाचक ईश्वर रेग्मीले कथा वाचन गर्नेछन् ।

महायज्ञ बिश्व शान्तिका लागि आयोजना गरिएको हो । चैत ८ गतेदेखि १६ गते सम्म चल्ने महायज्ञमा पाठ पुराण, ३० भन्दा बढी पण्डितहरुले स्वस्ति वाचन गर्नेछन् । स्थानीय समाजसेवि एवं कञ्चन गाउँपालिका वडा नं. १ का वडाअध्यक्ष हरिनारायण थारुले समाज अन्धकारमा गएको, नैतिकता हराएको भन्दै महायज्ञबाट नैतिक शिक्षाका साथै धर्म संस्कृतिको रक्षा हुने बताए । त्यस्तै थारुले महायज्ञ सफल पार्न वडाले गर्नुपर्ने सहयोगका लागि तयार भएको बताए ।

त्यस्तै धर्ती माता विष्णु कुँवरले परिचित बिष्णु कुंवरले शान्ति र धर्मका लागि आफुले महायज्ञ गर्न लागेको बताईन् । सनातन धर्मको रक्षाका साथै अनुशासन र नैतिक शिक्षा उपलब्धि महायज्ञको मुख्य उद्देश्य रहेको उनको भनाई छ । धर्म गर्ने संस्कारको विकास समेत महायज्ञबाट हुने उनले बताईन् । धर्ती माताबाट प्रभावित भएर अमेरिकाबाट नेपाल आएकी सीता थापाले धर्ती माताले सर्वत्र शान्तिको कामना गर्दै हिंडेको भन्दै सबैले धर्म र संस्कृतिलाई अनुसरण गर्नुपर्ने बताइन् ।

पत्रकार सम्मेलनमा बोल्दै आचार्य विशालले मुलुकमा नैतिक शिक्षा नहुँदा समाज दिन प्रतिदिन अराजकतातर्फ अगाडि बढिरहेको भन्दै यसको अन्त्यका लागि धर्म संस्कृतिको रक्षा, सम्बर्द्धन र यसको जगेर्ना गर्नु अपरिहार्य रहेको बताए ।