आजदेखि मणिमुकुन्द भलिबल, नवलपरासी र म्याग्दी बीच पहिलो खेल

बुटवल । मणिमुकुन्द भलिबल क्लब तिलोत्तमाको आयोजनामा आजदेखि आठौं रनिङशिल्ड भलिबल कप  हुँदै छ । क्लबको खेल मैदान तिलोत्तमा २ मा हुने प्रतियोगिताको पहिलो खेल बिहान १० बजेदेखि नवलपरासी र म्याग्दीका बीच हुँदै छ ।

लिक कम नकआउटका आधारमा खेलाइने प्रतियोगिताका सबै खेल वेस्टअफ पाइभ हुने आयोजकले जनाएको छ । विभिन्न प्रदेशका १० टिम सहभागी प्रतियोगिताको विजेताले रनिशिल्डसँगै नगद राशी १ लाख ५० हजार, कप, मेडल र प्रमाणपत्र प्राप्त गर्ने क्लबका अध्यक्ष लोकेन्द्र भण्डारीले जानकारी दिए । माघ २८ गतेसम्म सञ्चालन हुने प्रतियोगिताक उपविजेताले १ लाख नगद राशीसहित कप मेडल र प्रमाणपत्र प्राप्त गर्ने छ ।  तृतीय हुने समुहले ५५ हजार नगद राशी तथा सान्त्वनाले ३० हजार नगद राशीसहित कप मेडल र प्रमाणपत्र प्राप्त गर्ने छ । विधागततर्फ उत्कृष्ट खेलाडीले नगद १० हजारसहित कप, मेडल र प्रमाणपत्र प्राप्त गर्ने छ । यसैरी बेस्ट सेटर, बेस्ट स्पाइकर, बेस्ट डिफेन्डर, बेस्ट ब्लकर तथा म्यान अफ दि म्याचलाई पनि पुरस्कारको व्यवस्था गरिएको अध्यक्ष भण्डारीले बताए । 

प्रतियोगितामा समूह ए अन्तरगत बागलुङ, म्याग्दी र नवलपुर रहेका छन् । यसैगरी समूह बी मा नवलपरासी र गुल्मी, सी मा रुपन्देही र पर्वत तथा समूह डी मा स्याङ्जा र पाल्पा रहेका छन् । खेलाडीहरुका लागि खाना, नास्ता, आवास तथा यातायातको समेत व्यवस्था गरिएको प्रतियोगिता संयोजक सुरेन्द्र गुरुङले बताए । प्रतियोगिताको ग्लोबल आवाजले प्रत्यक्ष प्रसारण गर्ने छ ।