मारवादी सेवा संघ भैरहवाको २२ कोठे भवन उद्घाटन

बुटवल । लुम्बिनी प्रदेशका मुख्यमन्त्री लिला गिरीले मुलुकको अर्थतन्त्र सुधारका लागि निजी क्षेत्रसँग सहकार्यको आवश्यकता औल्याएका छन् । धरासयी बनेको अर्थतन्त्रलाई सुधार गर्दै प्रदेशको समृद्धिका लागि आफ्नो प्रमुख लक्ष्य रहेको बताउँदै उनले त्यसका लागि निजी क्षेत्रसँग सहकार्य गर्न सरकार तयार रहेको उल्लेख गरे । मारवाडी सेवा संघ भैरहवा नवनिर्मित भवनको शनिबार उद्घाटन गर्दै मुख्यमन्त्री गिरीले मुतुकको अर्थतन्त्रको अवस्थाप्रति चिन्ता व्यक्त गरेका हुन् ।

सिद्धार्थनगर–५ मा बनेको संघको २ तले २२ कोठाको भवन उद्घाटन गर्दै मुख्यमन्त्री गिरीले भैरहवाको गौतमबुद्ध अन्तर्राष्ट्रिय विमानस्थललाई सञ्चालनमा ल्याएर आर्थिक समृद्धिमा लाग्नका लागि आफ्नो जोड रहने बताए । संघको लगानीमा बनेको भवनमा सभाहल, भोजनालय, कार्यालय सञ्चालन कक्षसहित २२ वटा कोठा रहेको अध्यक्ष हेमन्त अग्रवालले जानकारी दिए । २ करोड ८५ लाख लागतमा निर्माण गरिएको भवनलाई थप व्यवस्थित गर्दै लगिने उनले बताए ।

मारवादी संघले सामाजिक क्षेत्रमा गरेका योगदानहरुको प्रशंसा गर्दै लुम्बिनी प्रदेशका सांसद सन्तोष पाण्डेयले सहकार्य र सहयोगका लागि आफू सधै तयार रहेको बताए । उद्योगी व्यवसायीको पक्षमा आफ्नो साथ सधै रहने बताउँदै उनले यससँगै सामाजिक क्षेत्रमा समेत योगदान गर्न निजी क्षेत्रलाई आग्रह गरे । सिद्धार्थनगर नगरपालिकाका प्रमुख इस्तियाक अहमद खानले थप मर्यादित र सक्रिय भएर लाग्न आग्रह आवश्यक सहयोग र सहकार्यका लागि तयार रहेको बताए ।

कार्यक्रममा नेपाल रास्ट्रिय मारवाडी परिषदका उपाध्यक्ष तथा कार्यवाहक अध्यक्ष राम अवतार अग्रवाल, पूर्व अध्यक्ष तथा सल्लहाकार नन्दलाल गोयन्का, मारवाडी सेवा सङ्घका महासचिव अरुणकुमार अग्रवाल, मारवाडी महिला मंचका अध्यक्ष अमिता अग्रावाल लगायतले बोल्दै संघलाई सामाजिक क्रियाकलापमा थप सक्रिय बनाउँदै लैजानुपर्नेमा जोड दिए ।