नेपाल पुनः प्रयोग योग्य बस्तु व्यवसायी संघ रुपन्देहीमा पदस्थापन

बुटवल । नेपाल पुनः प्रयोग योग्य बस्तु व्यवसायी संघ रुपन्देहीको पदस्थापन तथा सपथ कार्यक्रम शनिबार बुटवलमा सम्पन्न भएको छ । सो अवसरमा बोल्दै व्यवसायीहरुले छुट्टै र व्यवस्थित ठाउँको व्यवस्थापनका लागि माग गरेका छन् ।

बजारमा दैनिक रुपमा उत्पादन हुने फोहरजन्य बस्तुलाई पुनः प्रयोग गर्नेगरी संकलन गरी सरसफाई व्यवस्थापनमा सहयोग गरेको बताउँदै व्यवसायीहरुले यो पेशालाई मर्यादित पेसाको रुपमा हेर्न समेत आग्रह गरे । पनुः प्रयोग जन्य बस्तुको संकलन तथा विक्रि वितरण गर्ने क्रममा स्थानीय सरकारले लगाउने कर अवैज्ञानिक भएका कारण एउटै व्यवसायीले एक बस्तुका लागि ठाउँमा कर तिर्नु पर्ने बाध्यताको अन्त्य गर्न उनीहरुले माग गरे । कतीय स्थानमा पुनःप्रयोग योग्य बस्तुका व्यवासायीकोमा स्थानीय सरकारबाट ताला लगाउने तथा दुःख दिने काम भएको गुनासो गर्दै उनीहरुले यसको समाधानका लागि छुट्ट ठाउँको व्यवस्था गरिदिन आग्रह समेत गरे ।

कार्यक्रममा बोल्दै बुटवल उपमहानगरका प्रमुख खेलराज पाण्डेले पुनः प्रयोग योग्य बस्तुका व्यवसायीहरुलाई समान र सम्मानजनक व्यवहारसहित उनीहरुका समस्या सम्बोधना गर्नेगरी कार्योजना ल्याउने तयारी भएको उल्लेख गरे । कतिय स्थानमा स्वयम् व्यवसायीहरुले पनि मर्यादा पालना गर्नुका साथै व्यवसाय सञ्चालनअघि अपनाउनु पर्ने सबै प्रक्रिया पूरा गरेर अघि बढ्न उनले सुझाब दिए । रुपन्देही उद्योग संघका अध्यक्ष माधव प्रसाद पौडेलले व्यवसायीहरुले पुर्याएको योगदानलाई स्थानीय सकारले भुल्न नहुने तर्क गरे । दैनिक रुपमा उत्पादन हुने फोहर जन्य बस्तुलाई पुनः प्रयोगमा ल्याएर व्यवसायीहरुले शहरलाई सफा सुन्दर राख्नुका साथै आर्थिक रुपमा समेत रोजगारी सिर्जना गर्ने काम गरेको उनले बताए ।

कार्यक्रममा बोल्दै संयुक्त मधेशी संघका अध्यक्ष गौरीशंकर गुप्ता, पुनः प्रयोग योग्य बस्तु व्यवसायी संघ रुपन्देहीका निवर्तमान अध्यक्ष जवाहरलाल जैशवाल, नव निर्वाचित अध्यक्ष भगवती जैशवाल लगायतले बोल्दै पुनः प्रयोग व्यवसाय सञ्चालनका लागि स्थानीय सकारले छुट्टै ठाउँको व्यवस्थापनका लागि मागलाई दोहोर्याए ।