बुद्धकालिन सम्पदासँग जोडेर सैनामैनाको बिकास : विष्णु पौडेल

बुटवल । पूर्व अर्थमन्त्री तथा नेकपा एमालेका उपाध्यक्ष विष्णुप्रसाद पौडेलले बुद्धकालिन परम्परासँग जोडेर सैनामैनाको बिकास गरिने बताएका छन् । सैनामैनालाई बिकासको नयाँ मानकको रुपमा स्थापित गर्नका लागि यहाँको ऐतिहासिक तथा धार्मिक स्थलहरुको संरक्षण र बिकास गरिने उल्लेख गरे ।

बुद्धकालिन परम्परालाई लुम्बिनी, रामग्राम र तिलौराकोटलाई मात्र जोडेर पूरा नहुने बताउँदै उनले सैनामैना पनि यसमा जोडिएको दाबी गरे । यहाँका बौद्धकालिन ऐतिहासिक स्थलहरुको उत्खनन् र संरणसँगै यहाँका अन्य धार्मिक स्थलहरुको समेत बिकास गरिने उनले बताए । सैनामैनालाई लुम्बिनीसँग जोड्नकै लागि मुलुककै लामो चक्रपथ निर्माणको काम भएको उनले बताए । काठमाण्डौं उपत्यकाकोभन्दा लामो रहेको सैनामैनाको ५७ किलोमिटर चक्रपथ मध्ये ४० किलोमिटर कालोपत्रे भैसकेको बताउँदै उनले यो योजना सपन्न भएपछि यहाँको आर्थिक तथा सामाजिक बिकासमा उल्लेख्य परिवर्तन आउने दाबी गरे ।

रुपन्देही–२ बाट प्रतिनिधिसभा सदस्यको उम्मेदवार पौडेलले बुधबार सैनामैनाका विभिन्न वडाहरुमा घरदैलो तथा भेटघाटमा बोल्दै सैनामैनामै रहेको पश्चिम नेपालकै पशुपति भनेर परिचित बोलबमधाम मन्दिरलाई गुरुयोजनाअनुसार संरचनाहरु निर्माण र बिकासको काम भैरहेको बताए । हरेक वर्ष लाखौले दर्शन गर्न आउने बोलबम धामको बिकास, ऐतिहासिक रानिकुवाको संरक्षण, सैनामैना क्षेत्रको उत्खनन् तथा संरक्षणले यहाँको पर्यटकीय बिकासमा उल्लेख्य टेवा पुग्ने उनले बताए ।

कुनै पनि दल वा व्यक्तिको टिप्पणीमा नलागेर आफ्नो ध्यान रुपन्देहीको बिकासमा केन्द्रित भएको बताउँदै पौडेलले आगामी मंसिर–४ को निर्वाचनमा जनताले मुलुकको नेतृत्व नेकपा एमालेलाई सुम्पिने दाबी गरे । एमाले नेतृत्वको सरकारले नै मुलुकलाई सही दिशा र नेतृत्व दिन सक्ने बताउँदै उनले त्यसका लागि सूर्यमा मतदान गर्न जनता समक्ष आग्रह गरे ।

यसैगरी लुम्बिनी प्रदेशका पूर्व मन्त्री तथा रुपन्देही क्षेत्र नम्बर २ (२०) बाट उम्मेदवार भोजप्रसाद श्रेष्ठले विगतमा एमाले नेतृत्वले गरेका बिकास निर्माणका कामलाई पूर्णता दिनका लागि फेरी पनि एमालेलाई जिताउन आवश्यक रहेको बताए । एमाले नेतृत्वमा सुरु भएका विभिन्न भौतिक पूर्वाधारहरुलाई वर्तमान गठबन्धन नेतृत्वको सरकारले बेवास्ता गर्दा पूर्णता पाउन नसकेको बताउँदै उनले त्यसका लागि एमाले नै नेतृत्वमा आउनु पर्ने बताए ।