काठमाडौं । गए रातिको भूकम्पमा परी गम्भीर घाइते भएका पाँचजनाको डोटी अस्पतालमा उपचार भइरहेको छ ।
घाइतेलाई नेपाली सेनासहितका सुरक्षाकर्मीको टोलीले उद्धार गरी उपचारका लागि बुधबार बिहान हेलिकोप्टरमार्फत डोटी अस्पताल पुर्याइएको नेपाली सेनाका प्रवक्ता नारायण सिलवालले जानकारी दिए ।
सुर्खेत र कैलालीको धनगढीबाट लगिएको हेलिकोप्टरमार्फत उनीहरूको उद्धार गरिएको हो । उद्धारसँगै तत्काल आवश्यक खाद्यान्न र टेन्ट समेत लिएर भैरवनाथ गणको टोली सो क्षेत्रमा खटिएको सेनाले जनाएको छ ।
गए राति २ बजेर १२ मिनेटमा डोटीस्थित खप्तड राष्ट्रिय निकुञ्ज क्षेत्रमा केन्द्रविन्दु भएर ६.६ म्याग्निच्युडको भूकम्प गएको हो । भूकम्पबाट डोटीको पूर्वीचौकी गाउँपालिका–३, गैरागाउँमा घर भत्किँदा ६ जनाको मृत्यु भएको थियो । उक्त ठाउँमा आठ घर पूर्ण रूपमा भत्किएर क्षति पुगेको बताइएको छ ।
प्रतिक्रिया