बुटवल । रुपन्देही डान्स स्टारको ग्राण्ड फिनाले असोज १ मा हुने भएको छ । छमछमी कला केन्द्र बुटवलको आयोजनमा भएको तेस्रो संस्करणको प्रतियोगिता भदौं ४ गतेबाट सुरु भएको थियो । प्रतियोगिताको फाइनल बारे सोमबार आयोजक छमछमी कलाकेन्द्रले पत्रकार सम्मेलन गरी जानकारी गराएको हो ।

बुटवल लगाएत रुपन्देहीका विभिन्न स्थानमा भएको अडिसनमा ३ सय बढीले सहभागिता जनाएको प्रतियोगितामा उपाधिका लागि फाइनलमा १५ जनाले प्रतिष्पर्धा गर्ने कला केन्द्रका अध्यक्ष किशोर थापाले जानकारी दिए।

लुम्बिनी वाणिज्य क्याम्पस बुटवलमा हुने फाइनलमा राष्ट्रिय गायक हेमन्त शर्माको प्रस्तुति समेत रहने उनले जानकारी दिए। फाइनलमा ७० प्रतिशत निर्णायकको निर्णय र ३० प्रतिशत(बढीमा ५ हजार बराबरको) भोटिङको माध्यमबाट नतिजा निकालिने जानकारी दिए। फाइनलको निर्णायकमा कलाकारहरू नारायण थापा, अनु रजक र गीता थापा घिमिरे रहने उनले बताए।

एकल, जोडी र सामूहिक गरी ३ विद्यामा हुने प्रतियोगितामा विजेतालाई ७० हजार नगद र म्यूजिक भिडियोमामा अवसर तथा द्वितीयलाई ५० र तृतीयलाई ३० हजार पुरस्कार प्रदान गरिने पूर्व निर्णय भएको बताउँदै उनले यसमा पुरस्कार थपिएको बताए। थपिएको पुरस्कार प्रथम र द्वितीयलाई बुटवलको गार्गी एकेडेमीले कक्षा ११ र १२ निःशुल्क अध्यापन गराउने तथा फाइनलमा पुगेका १५ जनालाई क्यानन मावि बुटवलले कक्षा १२ सम्म ५० प्रतिशत छुटमा अध्यापन गर्ने सम्झौता भएको बताए।