औद्योगिक पत्रकारिता पुरस्कार पत्रकार केशीलाई

मंसिर १५,

ग्लोबल आवाज

बुटवल । रुपन्देही उद्योग संघले स्थापना गरेको उत्कृष्ट औद्योगिक पत्रकारिता पुरस्कार २०७५ बाट पत्रकार नरेश केशी पुरस्कृत भएका छन् । रुपन्देहीको भैरहवा र लुम्बिनीलाई कार्यक्षेत्र बनाई राष्ट्रिय तथा स्थानीय मिडियामा कार्यरत पत्रकार केशीलाई संघको स्थापना दिवसको अवसरमा पुरस्कृत गरिएको हो । कार्यक्रमका प्रमुख अतिथि उद्योग, पर्यटन, वन तथा वातावरण मन्त्री लिला गिरी, नेपाल उद्योग परिसंघका प्रदेश संयोजक एजाज आलम तथा संघका अध्यक्ष बाबुराम बोहोराले पत्रकार केशीलाई सम्मानपत्र तथा नगद पुरस्कारद्धारा पुरस्कृत गरेका थिए ।

२०५७ सालमा ५ हजार राशीबाट स्थापना गरिएको उत्कृष्ट औद्योगिक पत्रकारिता पुरस्कारको राशीलाई गतवर्षदेखि ३५ हजार ५ सय ५५ रुपैया बनाईएको छ । त्यस्तै रुपन्देही उद्योग संघले विभिन्न विधाका ५ जना उद्योगीलाई उत्कृष्ट उद्योगीको रुपमा सम्मान गरेको छ । संघले कृषि तथा पशुजन्य उद्योगतर्फ एनएस एग्रो एण्ड लाईफ स्टक, युवा उद्यमीतर्फ भुसाल केबल एण्ड वायर इण्डष्ट्रिजका अंमृत भुसाल, महिला उद्यमीतर्फ सिद्धार्थ डेरीका गिता भट्टराई, प्रविधि उद्योग तर्फ बुटवल रेडिमिक्स र पशुपालन तर्फ बस्नेत गाईभैंसी फर्मलाई उत्कृष्ट उद्योगीको रुपमा सम्मान गरिएको हो ।

त्यस्तै स्थापना दिवसको अवसरमा २०३५ सालमा संघलाई स्थापना गर्ने संस्थापक सदस्य कालिप्रसाद चौधरी तथा संघका पुर्व कार्यालय सचिव टिकाराम शर्मालाई सम्मान गरिएको थियो । यसैगरी संघले उद्योगमा कार्यरत मजदुरका छोराछोरीमध्ये दुईजनालाई छात्रवृत्ति प्रदान गरेको छ । छात्रवृत्ति प्राप्त गर्नेहरुमा दुर्गादत्त माविमा अध्ययनरत दिपीका गुरुङ र रामनगर माविमा अध्ययनरत लिल बहादुर गुरुङ रहेका छन् । दुवैजनालाई नगद १० हजार १ सय ५५ सँगै झोला तथा कापी कलम प्रदान गरिएको थियो ।

संघको स्थापना दिवसको अवसरमा गौतमबुद्ध सामुदायिक मुटु अस्पतालले ११ गतेदेखि १५ गतेसम्म रु. १ मा ओपिडी टिकट, सुगर र युरिनरी सेवा तथा फुलबडी चेकअपमा २५ प्रतिशत छुट सुविधा उपलब्ध गराएको थियो । स्थापना दिवसकै अवसरमा १५ गते बिहान रक्तदान कार्यक्रमको आयोजना गरिएको थियो । कार्यक्रममा ५१ जना रक्तदाताले रक्तदान गर्नु भएको संयोजक यमलाल भट्टराई जानकारी दिए ।