नेपाल र भारतबीच दोस्रो मैत्रीपूर्ण खेल आज, किरणको किर्तिमान बन्दै

काठमाडौँ । नेपाल र भारतबीच अन्तर्राष्ट्रिय मैत्रीपूर्ण फुटबलको दोस्रो खेल आज हुदै छ । खेल सनाझ ५:३० बजे दशरथ रंगशालामा हुदै छ । यस अघि विहिबार भएको खेल १-१ गोलको बराबरीमा टुंगिएको थियो ।

नेपाल र भारबीच अहिलेसम्म फुटबलमा २० पटक भिडन्त भएको छ । भारत १३ पटक विजयी भएको छ भने नेपालले दुई चोटी मात्र जित निकाल्न सकेको छ । पाँच खेलमा दुवै टोलीले बराबरी खेलेका छन् । विश्व फुटबल महासङ्घको (फिफा) वरियतानुसार भारत १०५ औँ स्थानमा छ भने नेपाल १६८ स्थानमा रहेको छ ।

विहिबार नेपाल र भारतबीचको पहिलो मैत्रीपूर्ण खेलमा एक-एक गोलको बराबरीमा खेल सकिएको थियो । नेपालले पहिलो हाफमा अग्रता लिएको थियो । सो अग्रतालाई दोस्रो हाफमा कायमै राख्न नसक्दा बराबरी खेल्नु परेको हो । नेपाल पहिलो हाफमा १–० गोलले अगाडि रहेको थियो । नेपालका लागि खेलको ३६औं मिनेटमा अञ्जन विष्टले गोल गरेका थिए । राष्ट्रिय टोलीका लागि अञ्जनको त्यो पाँचौ गोल हो । यसअघि चाइनिज ताइपेविरुद्ध विश्व कप छनौटका दुई खेलमा ३ गोल गरेको अञ्जनले अर्को गोल इराकविरुद्धको मैत्रीपूर्ण खेलमा गरेका थिए ।

नेपालले दोस्रो हाफमा पनि गोलको प्रयास गरेको थियो । भारतीय गोलकिपर गुरप्रितसिंह सान्धुले नेपाली टोलीको प्रयास विफल पारिदिएका थिए । मध्यान्तरपछिको खेलमा भारतले नेपालविरुद्ध गोल गर्न सफल भयो । खेलको ६०औँ मिनेटमा भारतका लागि अनिरुद्ध थापाले गोल गरेका थिए ।

किरण चेम्जोङको किर्तिमान बन्दै 

नेपाली गोलकिपर चेम्जोङले नेपालको तर्फबाट सर्वाधिक अन्तर्राष्ट्रिय खेल खेल्ने कीर्तिमान बनाएका विराज महर्जनसँग विहिबार बराबरी गरेका थिए । महर्जनले नेपाली टोलीबाट सन्यास लिइसकेका छन् । महर्जन र चेम्जोङ नेपाली टोलीबाट समान ७३ खेल खेलेका छन् । आजको किरणले नेपालका लागि सर्वाधिक खेल खेल्ने खेलाडी बन्नेछन् ।

भारतसँगको मैत्रीपूर्ण खेलपछि शुक्रबार नेपाली टोली साफ च्याम्पियनसिपको अन्तिम तयारीका लागि कतार जानेछ । नेपाली टिम कतारबाट माल्दिभ्समा सुरु हुने साफ च्याम्पियनसिपमा भाग लिन जानेछ । आयोजक समेत रहेको साविक विजेता माल्दिभ्सविरुद्ध नेपालले असोज १५ गते पहिलो खेल खेल्दै छ ।

त्यस्तै नेपालको दोस्रो खेल श्रीलंकाविरुद्ध असोज १८ गते खेल्ने छ भने भारतविरुद्ध असोज २४ गते खेल्ने छ । त्यस्तै बंगलादेशविरुद्ध असोज २८ गते खेल्ने छ ।