परासी । नेपाल पत्रकार महासंघ पश्चिम नवलपरासीले पत्रकार कल्याणकारी कोष स्थापना गरेको छ । बिहीबार बसेको महासंघको कार्यसमिति बैठकले कोष स्थापना गर्ने निर्णय गर्दै कोषमा आर्थिक सहयोग गर्न अनुरोध समेत गरेको छ ।
बाढीका कारण धेरै पत्रकार अप्ठ्यारोमा परेका बेला कोषको आवश्यकता महशुस गर्दै आगामि दिनमा अन्य विपत्तिमा समेत पत्रकारलाई सहयोग गर्न सकिने भएकाले कोष स्थापना गर्ने निर्णय गरिएको अध्यक्ष हरि शर्माले बताए । प्रभु बैंक परासी शाखाको खाता नम्बर ०५००१५१९३९५०००११ रकम जम्मा गर्न सकिने छ ।
कोष संञ्चालनका लागी अध्यक्ष शर्माकै अध्यक्षतामा पाँच सदस्यीय समिति पनि बनाईएको छ । कोषमा आजै २० हजार रुपैयाँ जम्मा भएको छ । जसमा लुम्बिनी दैनिक बुटवलले १० हजार र पत्रकार महासंघ पश्चिम नवलपरासीका कोषाध्यक्ष प्रकाश न्यौपाने र सहसचिव श्याम बुचा मगरले ५/५ हजार रकम जम्मा गरि सहयोग गरेका छन् ।
साथै महासंघको बैठकले प्रत्येक वर्ष बाढी पहिरोका कारण जनधनको क्षति हुने गरेको बताउँदै तीनै तहका सरकारलाई गम्भिर भएर समस्याको दिर्घकालीन समाधान खोज्न आग्रह पनि गरेको छ । पश्चिम नवलपरासीमा हरेक वर्ष बाढीका कारण ठूलो क्षति हुनेगरेपनि समस्या समाधानका चासो नदिएको पाईएकाले प्रभावकारी कदम चाल्न माग गरिएको सचिव राजकुमार रेश्मीले बताए ।
महासंघले पश्चिम नवलपरासीमा बाढीका कारण मृत्यु भएका परिवारलाई देउराली फाउन्डेसनले उपलब्ध गराएको आर्थिक सहयोग वितरण गर्न सहजीकरण गर्ने पनि निर्णय गरेको छ ।
युनिकोड
मिति रूपान्तरण
ग्लोबल आवाज
प्रतिक्रिया